WEB Bonaire su reakshon riba komunikado tokante tarifanan

Logo WEBRiba djaweps 8 di febrüari 2018 WEB Bonaire a tuma nota di un komunikado di prensa di un siudadano aserka tarifanan di WEB. Nos a komprondé for di e komunikado ku no ta klaro pa tur hende ainda ku e introdukshon di e forma di kobransa di awa i koriente nobo ta basa riba lei i tampoko ta klaro kiko e ta enserá. Ainda tin konfushon entre e tarifa fiho i tarifa variabel ku ta bai wòrdu introdusí na Boneiru i e sistema ku ta wòrdu utilisá na Hulanda. Nan no ta meskos i den niun sentido komparabel.

E manera di kobra awa i elektrisidat nobo desde aprel 2018 ta ankrá den lei di awa i elektrisidat. E parti fiho ta basa riba kostonan fiho di WEB i esei ta wòrdu stipulá dor di ACM. E parti variabel pa e kliente ta basa riba e kostonan variabel di WEB ku tambe ta wòrdu stipulá dor di ACM. E tarifa ku WEB mester paga Contour Global, ku tambe ta wòrdu stipulá dor di ACM, tin influensia grandi riba e parti variabel. En korto, WEB ta aktua konforme di lei pa loke ta trata tarifa. E lei ta disponibel entre otro riba wèpsait di WEB, ACM i Unkobon.

WEB ta komprondé ku e materia ta kompliká. WEB lo sigui traha riba e parti di informashon pa aklará mihó kiko e tarifanan nobo ta enserá pa kada siudadano. Pa konfirmá lokual nos ta komuniká nos ta invitá kada siudadano ku tin mas duda òf pregunta pa tuma kontakto ku ACM òf Unkobon pa un splikashon amplio riba esaki.