TELBO ta desaroyá den Kralendijk

Telbo-logo-2014-01TELBO ta informá pueblo di Boneiru i spesífikamente habitantenan di Kralendijk i besindario riba e desaroyo di e proyekto ‘Fiber to the Home’ (FTTH). Segun plan riba 14 di febrüari benidero, ta kuminsá ku kobamentu den un parti di Kralendijk i besindario. E durashon di e proyekto ta planiá pa dura den un temporada di 18 luna den e área menshoná.

TELBO ta den e proseso pa implementá su ret di ‘Fiber te na Kas’ ku lo konektá tur kas i negoshi na Boneiru ku kabel di ‘fiber’. E ret di ‘fiber’ lo remplasá nos ret aktual di koper ku su tempu a pasa. E konekshon di ‘fiber’ ta unu konfiabel i duradero, i no tin ningun limitashon riba e velosidat di dato di internèt i otro servisionan.

TELBO ta pidi pa habitantenan di Kralendijk i tambe automobilistanan pa tene kuenta ku e trabounan den e siguiente kayanan: Kaya Betico Croes, Kaya Italia, Kaya Irlandia, Kaya Londres, Kaya Hulanda, Kaya Finlandia, Kaya Industria Pabou (BWM i besindario), Nikiboko Suit, Den Chefi i besindario, Kaya Industria (Tera Kora) i Kaya Industria Pariba i besindario.

TELBO i su partnernan ta hasi nan bèst pa minimalisá kualkier inkonbeniensia durante di e trabounan den e área menshoná i pa kompletá e trabou dentro di e tempu planiá.

TELBO ta yama danki na pueblo di Boneiru pa e sosten i koperashon den e proseso di e proyekto ‘Fiber te na Kas’.