Subimentu bai tòp di Boneiru na salida di solo

sunrisehikeAta un otro chèns pa subi bai e punta di mas haltu di nos isla! Pa motibu di tantu petishon, STINAPA ta ofrese otro oportunidat pa subi Brandaris na salida di solo riba djadumingu 13 di ougùstùs 2017.

Bo a yega di ekperensiá salida di solo subiendo Brandaris? Lo bai tin un kaminata pa e punta mas haltu di Boneiru djadumingu 13 di ougùstùs. Tur hende mester ta presente na  entrada di Parke Nashonal Washington-Slagbaai no mas tardá pa 5’or di mainta pa nos por kuminsa subi na tempu.

Tin luga pa 20 partisipante. Yama 717-8444 pa registrá i sigurá ku abo tambe t’aden Tur hende ku ke partisipá mester registrá adelantá. Tur partisipante mester soru pa nan transporte pa parke i tambe pa paden di parke.

Partisipashon na subimentu di Brandaris ta kosta $10 pa persona. Partispantenan mester ta presente for di 5’or di mainta. Un bon kondishon fisiko ta hopi importante. Muchanan 10 aña bai ariba tin mag di partisipá akompañá pa nan mayornan of un adulto. Bisti kèts, bin ku bo bòter di awa i algu pa pasa boka. No lubida di bin ku un flèshlait ku ta traha.

E di dos parti di e kaminata lo ta kasi gatiá, pero asina bo yega ariba, e bista lo ta espektakular! Parti di e subida lo ta den skur, ke men soru pa bo tin un flèshlait ku ta traha. Tur hende lo ta bèk na entrada di parke banda di 8.30’or di mainta.

Si bo ke tin un eksperensia eksitante i úniko yama nos na 717-8444 pa registra i nos ta topa dia djadumingu 13 di ougùstùs 2017.