Staten-Generaal unánimamente ta bai di akuerdo ku intervenshon na  Sint Eustatius

Plenaire_zaal_Eerste_KamerAwe e proposishon di lei ku ta sòru pa intervenshon den gobernashon na  Sint Eustatius, a keda aseptá  unánimamente dor di Tweede i Eerste Kamer. Sekretario di Estado Raymond Knops (Relashonnan den Reino), ta  biaha djárason mainta pa Sint Eustatius pa duna informashon di e desishon na e komunidat, mandatarionan i Konseho Insular.

E lei ta stipulá ku ta disolvé Konseho Insular i ku ta baha  e diputadonan i gezaghèber interino for di nan funshon. Djárason lo nombra un komisario di gobièrnu Sentral ku lo sòru pa gobernashon di Sint Eustatius.

Loke a kondusí pa hasi e intervenshon aki ta e rapòrt di e komishon di sabionan ku a publiká ayera.  E komishon ta konstatá un gran negligensia di tareanan di gobernashon di e isla.  E situashon gubernamental tin konsekuensianan grandi pa e bida diario di e habitantenan di Sint Eustatius.

Medidanan previo pa mehorashon di e situashon no tabatin e efekto deseá.  “E ta un medida pisá, pero awor ku tur otro opshon no a duna fruta, esaki ta e uniko opshon ku a keda. E hendanan di Sint Eustatius meresé mihó.”, segun Sekretario di Estado Knops .

E Sekretario di estado lo informá miembronan di Kolegio Ehekutivo  i di Konseho Insular riba djárason.   Despues di esei e lo papia ku komunidat durante di un asina yamá  Town Hall meeting. Einan tambe e lo introdusí e komisario di gobièrnu di Reino. Despues e lo biaha pa Sint Maarten den kuadro di rekonstrukshon di e isla despues di orkan Irma.