Sinku hóben di BYOF ta bai presentá na Aruba

TeamRiba invitashon di Kas di Kultura Aruba, ku ta organisadó di Gèng di Arte, sinku hóben di Bonaire Youth Outreach Foundation (BYOF) ku ta partisipá den e programa di arte yamá BYOF Arts, lo bai presentá na Aruba. Gèng di Arte ta e kompetensha di talento di Aruba. E aña aki lo ta e di 11 edishon di e kompetensha aki.

Durante di e Theater booth camp ku a tuma lugá den e promé siman di vakashon BYOF Arts a skohe sinku hóben for di trinta partisipante pa bai Aruba. E hóbennan a keda skohé a base di nan prestashon durante di e ultimo seis lunanan. A evalua e hóbennan riba kresementu di nan talento pero tambe nan komportashon i prestashon na skol. E tabata un eskoho hopi difísil ya ku tabata tin mas ku sinku ku a kumpli ku e eksigensianan pa por bini na remarke pero ta sinku hóben so por a keda invitá pa bai e interkambio aki.

E sinku hóbennan a prepara diariamente, bou di guia di Segni Bernardina i Damari Alonzo, pa asina nan ta bon prepará pa bai presentá un tremendo presentashon den e teater nashonal di Aruba. Dia 9 di ougustus elenko di BYOF Arts lo sali pa Aruba pa asina asistí na e ensayo general pa despues, dia 10 subi esenario pa presentá nan presentashon titulá “Boneiru ta den kaya”. E presentahon aki ta basá riba e tema ku a keda skohé e aña aki pa Gèng di arte. E tema ta “Kaya”.

E hóbennan ku lo bai representá BYOF na Aruba lo ta Cassius Rosario, Richmend Anthony, Jeremy Pikerie, Jorge Gonzalez i Caroline Porras. E team di media di BYOF media tambe lo biaha ku e grupo pa dokumentá e presentashon i mas. BYOF media ta representá pa David Martinus i Angelo Alberto.

Direktor di BYOF Dennis Martinus ta sumamente kontentu ku por brinda e hobennan di BYOF Arts e oportunidat aki pa nan por sigui krese i amplia nan horizonte. Regularmente lo sigi saka e hóbennan for di Boneiru pa hasi e tipo di interkambionan aki, ku ta yudanan den nan desaroyo. Nos ta desea e team di BYOF Arts tur klase di ekstio na hermana Isla Aruba.