Selebrashon dia di hende grandi

DSC_0124Djadumingu último tabata Dia di Hende Grandi. E aña aki tabatin un programa festivo na Zozo Ranch ku e organisashonnan di 60+ a organisá. E hende grandinan a partisipá aktivamente na e selebrashon ku bailamentu, músika, karaoke i diferente wega.

Na e momentunan aki Boneiru konosé e siguiente aprupashonnan di 60+: Rekresaroyo 60+ na Tera Kòrá, Grasioso Uní na Nikiboko, AVANTI 60+ na Antriol, Orkidia na Nort’i Saliña i Kurason Kontentu na Rincon. E aña aki e kordinashon di e dia tabata na enkargo di sra Oliva Dortalina di Rekresaroyo 60+ Tera Kòrá. Otro aña AVANTI 60+ ta na turno.

Diputado Edsel Cecilia tabata presente i a dirigí palabra na e oudiensia. E anterior diputado Nina den Heyer tambe tambe a hasi akto di presensia. Sra Den Heyer a risibí un regalo komo muestro di apresio pa tur kos ku ela nifiká pa e agrupashonnan di 60+. Trahadónan di RCN di e unidat di Asuntunan Sosial i Labor tabata presente ku un stènt pa duna informashon i fortifiká e kontakto ku nos hende grandinan.

Durante e simannan benidero e unidat di Asuntunan Sosial i Labor i Entidat Públiko Boneiru huntu ku Fundashon Konsulta pa Grandinan Boneiru (FKG) ta bai drenta e barionan pa duna mas informashon na nos hende grandinan na Boneiru. Durante e maintanan aki ta duna informashon na nos hende grandinan tokante nan derechonan. Tambe nan por laga aktualisá nan fail di AOV i partisipá na un investigashon di FKG tokante e situashon di nos hende grandinan na Boneiru.

E enkuentronan ta tuma lugá riba e siguiente fechanan:      

Nikiboko Sentro di Bario Nikiboko Djaweps 19 di òktober 9.00 – 11.00
Nort ‘i Saliña Sentro Orkidia Djamars 24 di òktober 9.00 – 11.00
Rincon Cocari Djaweps 2 di novèmber 9.00 – 11.00
Tera Cora Sentro di Bario Tera Kòrá Djaweps 9 di novèmber 9.00 – 11.00
Antriol Antriol Avanti Djaweps 16 di novèmber 9.00 – 11.00