Sekretario di Estado Knops i Statia a hiba kombersashon habrí i franko

20171129_165119Riba djaweps 29 di novèmber durante e bishita inougural na Sint Eustatius di e Sekretario di Estado di e Ministerio di Asuntunan Interior i Relashonnan den Reino, Raymond Knops, a hiba kombersashon ku gezaghèber interino Julian Woodley, Diputado Derrick Simmons i miembronan di Konseho Insular. Despues di e kombersashonnan ku Kolegio Ehekutivo i Konseho Insular ku tabata habrí i franko, e Sekretario di Estado a presentá un karta na Diputado Simmons den kua gobièrnu di Reino ta otorgá 2 mion Euro na Entidat Públiko di Sint Eustatius pa rekonstrukshon den konteksto di e tareanan insular despues di e dos orkannan grandi den luna di sèptèmber.

E kontribushon di dos mion euro di un solo biaha aki ta bini riba e lokual ku ya gobièrnu di Reino a kontribuí ku ne pa medio di fondonan di emergensia i loke ku ta sigui komo parti di e fondonan di rehabilitashon i rekonstrukshon ku e ministerio a pone disponibel pa yuda Sint Eustatius.

E fondonan aki ta destiná pa proyektonan di restorashon ku ta kai bou di responsabilidatnan i ta mará entre otro na e siguiente kondishonnan: E fondonan mester keda usá di mas tardá 31 di desèmber 2019, no ta permití pa usa e fondonan pa restourá entidatnan registrá pa derecho privá, e asina yamá entidatnan gubernamental; anualmente un reportahe di progreso interno mester entregá di mas tardá 30 di yüni, proposishonnan di proyekto mester keda entregá via di gezaghèber na Ministerio di Asuntunan Interior i Relashonnan den Reino i den e kuadro di e supervishon preliminar aplikabel, den konsulta ku CFT, lo konsiderá kon e aplikashonnan pa e proyektonan lo keda evaluá i kontrolá.

Sekretario di Estado Knops a splika ku e Ministerio di Asuntunan Interior i Relashonnan den Reino i e Ministerio di Infrastruktura  i Maneho di awanan lo hiba kombersashon ku Kolegio Ehekutivo pa haña nan input i pa establesé un lista di prioridat.

Den e enkuentro ku prensa Sekretario di Estado Knops i diputado Simmons a splika ku esfuersonan lo keda hasí pa traha riba fortifikashon di e relashon entre gobièrnu di Reino i Gobièrnu lokal na interes di e komunidat di Sint Eustatius.