Robby Beukenboom ke pa popne moshon di integridat di mandatarionan riba agenda pa reunion di Presidio di djaluna awor

 

Robby Beukenboom copyDen un karta dirigí na e presidente di Konseho Insular, E. Rijna, e lider di frakshon pa Demokrat Robby Beukenboom ta urgi e presidente pa pone e moshon di integridat di mandatarionan riba agenda pa e proksimo reunion di Presidio di djaluna awor. E karta ta bisa tekstualmente lo siguiente;

“Lidernan di Frakshon a risibí konvokashon (2018000031) pa un reunion di Presidio pa djaluna 8 di yanüari 2018 pa 5 or di atardi. Nos a pasa den e dokumentunan pa e reunion menshoná, sinembargo nos a sinti falta di un punto di agènda hopi importante ku kisas pa un omishon di sr. Presidente o sr. Grifier su parti no a subi agènda. Nos a tene pasenshi i a warda riba korekshon di e agènda, pero dia a yega sin ningun akshon di bo persona o sr. Grifier. Frakshonnan ku tabata laga aparentá komo sifuera nan ta mas santu ku santu tambe parse ku aña a habrinan sin lenga pa papia ni man pa skirbi.

Un moshon presentá pa koalishon i aprobá unánimamente pa Konseho Insular den e reunion di 19 di desèmber 2017, registrá bou di number 2017013195 a disidí na punto 5 ku: den e promé reunion di Presidio lo determiná e kuadro den kua e plan pa atendé e moshon aki por tuma lugá. Ta trata di un moshon ku a trata e punto di integridat serka mandatario i representantenan di pueblo. E promé reunion di aña a wòrdu konvoká pa bo persona sin e punto importante aki ta riba agènda. 

Nos Frakshon na múltiple okashon a mustra ku tin nesesidat urgente pa miembronan di Kolegio Ehekutivo i Konseho Insular tin un kuadro legal fuerte pa garantisá integridat den Gobernashon.  Sr. Presidente tambe a mira e nesesidat aki i a indiká esaki den un karta di 12 di desèmber 2017 bo persona a enfatisá ku ta Gezaghèber su responsabilidat pa ta wardiante di integridat den Gobernashon konforme artíkulo 172 di WolBes. 

Nos Frakshon ke mira e punto aki riba agènda di nos reunion di Presidio di djaluna benidero. Nos ke urgí bo persona pa kumpli ku punto 5 di Konseho Insular su moshon di 27 di desèmber último.”