Regata 50: un evento ku Boneiru por ta orguyoso di dje!

Official Regata Poster (1)E aña aki Regata ta selebrá su di 50 edishon anto nos por sigurá bo ku e ta mas grandi ku nunka. Hype Events, e organisadó di Regata ta sinti su mes honrá di por presentá no solamente pueblo boneriano pero tambe nos bishitantenan for di nos hèrmana islanan den Karibe un aniversario impreshonante pa nos Regata ku a kuminsá 50 aña pasá. Huntu ku Antigua, Boneiru tin e Regata di mas tantu aña den Karibe. Esei riba su mes ta un echo ku nos por ta orguyoso di dje. Mas ainda ku pa Boneiru Regata ta mas ku un evento deportivo manera ta e kaso na otro paisnan. Pa Boneiru esaki ta un evento ku un nifikashon importante. E ta un evento nashonal ku ta parti di nos kultura. Nos kompetensianan di ‘microboats’ i boto di piskadó ta e faktornan ku ta hasi nos Regata úniko, spesial i diferente for di otronan. Pueblo di Boneiru por ta orguyoso ku selebrashon di su di 50 edishon di Regata.

E organisashon di Regata ta kontentu ku e aña aki nos por konfirmá ku nos tradishonal botonan di piskadó ta bèk riba awa despues di hopi aña i ku e microboatnan tambe lo t’ei bèk den gran forma. Tambe nos por afirmá ku a risibí hopi inskripshon di yate, sunfish i optimist ku lo kompetí den diferente klase. E deportenan ekstremo manera windsurf i kitesurf tambe lo forma parti di e kompetensianan riba laman. Durante dia e ambiente ta konsentrá den Playa Pabou na ofisina di SKAL kaminda bo por sigui loke ta pasando riba laman i kaminda tambe tin diferente aktividat i kompetensia ta tuma lugá.

E parti ku hopi hende ta antisipá ta e fèstival ku ta tuma lugá anochi den sentro di Kralendijk. Un anochi ku hopi ambiente pa grandi i chikí ku músika i presentashon di artistanan lokal i internashonal. Durante e Fèstival di Regata tin mas di 25 stènt i trùk di kuminda i pasapalo pa skohe for di dje. Naturalmente tin aktividat pa mucha tambe na e ‘Kidscorner’ kaminda muchanan di tur edat por gosa. Djarason nos ta ranka sali ku Rincon Boys i Kassav, djaweps ta ERA i djabièrnè artistanan lokal manera Semi i Bonaire All Stars ta subi tarima. Djasabra e evento di Regata ta kulminá ku Fenty huntu ku Gigi i e banda popular ku a rementá e tarima prinsipal di Regata aña pasá ku ta Gentz. Entrada pa tur anochi ta kompletamente pòrnada. Tur anochi tin un àrea di VIP ku ‘open bar’ i pasapalu pa nos spònsernan i esnan ku ke un trato spesial. Pa mas informashon tokante e àrea di VIP por tuma kontakto ku Elaine na +599 777-5689 Un danki ta bai na tur e spònsernan di Regata 50 pasobra sin nan ayudo tur esaki no tabata posibel.

Un danki ta bai na Gobièrnu di Boneiru, Obersi Group, Fundashon Wega di Number, Don Andres, Insel Air, Maduro & Curiel’s Bank Bonaire, Curoil, Akkermans Bonaire, Nagico, Krioyo Paint Bonaire, Best Brands Bonaire, WEB, BWM, Budget Car Rental, Budget Marine, Cactus Accounting, Rocargo, Courtyard by Marriott Bonaire, Captain Don’s Habitat, Eden Beach Resort, Den Laman Condominiums,i nos partnernan di prensa lokal pa e kobertura total.