Pueblo nunka a aproba i disidi pa integrashon

entrega karta na NKBB_1OB3414Nos Kier Boneiru Bek na nomber di  pueblo di Boneiru ku su bos a wordu silensia ta kondena Maikel Pietersz,  Jeanuska Raphaela,  Cyrill Vrolijk i Joselito Statia manda pa nan lidernan Elvis Sjin Asjoe i Clark Abraham ku diaweps 6 di yuli 2017 den Konseho Insular di Boneiru a vota pro pa e moshon ku ta  kontradiktorio, traishonero i ilegal pa ankra Boneiru i su pueblo den konstitushon Hulandes. E ankramentu den konstitushon Hulandes su meta final ta aneksashon di Boneiru i su teritorio.

Boneiru su zona ekonomiko inkluyendo tur e posibel rikesanan natural, manera petroli i gas i tur bida marino, piska, ref ets i potenshal ku ta pertenese na e Boneriano ta wordu entrega bek na Hulanda dor di e  politikonan korupto aki. Nos tur sa bon bon ku tur lokual a negosha i firma ets prome ku 10-10-10 tabata bau di e kondishon ku pueblo mester a aproba i disidi ku nan kier e status aki. I pueblo nunka a aproba i disidi pa esaki, pa integrashon ni-parsial, i a protesta pa años, di tur sorto manera, i al final dor di sakrifisio ahumano a logra referendum di dezember 2015 kaminda e pueblo Boneriano sin laga niun duda a rechaza e status ilegal aki.  E derecho aki ta pertenese solamente na pueblo i no  na ningun politiko ni di Boneiru ni di Hulanda. No tin eskuus pa e politikonan kuropto aki, si Ramosito i Jopie no tabata sa kiko nos tabata bai hanja nos den dje,  e grupo aki si sa i a eksperiensa shete (7) aña di oprsehon i abuso kontra e pueblo. Kiko a pone nan hasie? Nan a wordu korumpi i paga dor di Hulanda?

E akto di kobardia i traishon aki kaminda ta entrega i hinka Boneiru bek den gara i barika di e kolonisadonan di mas kruel ku mundu a konose. Despues di segunda guera mundial Merka i Inglatera i e aliadonan mester a obliga i pone preshon riba Hulanda pa duna nos libertat komo pais outonomo Antias. I asina mes Hulanda di mala fe, a malinforma, manipula i engaña Nashonan Uni  juda pa elite di Antias, i a dirigi nos den e direkshon aki i a dividi i destrui Antias i re-kaptura e pueblonan inosente i humilde Boneiru, Saba i Sint Eustatius.

Naturalmente pa hasi esaki nan mester di aliadonan di nos mes pueblo. I esaki nan a bin ta kreando for di tempu di sklabitud, i ta pesey nan por a mantene nos antepasadonan bao di sklabitud kasi un siglo mas ku tur otro isla den Karibe. Pasobra e Hulandesnan a krea sistema di donjonan di katibu i bomba ku ora nan traishona nan mes hendenan i ta loyal na Rei i estado, nan ta rekompensa nan  ku sen i previlegionan i ta kondekora nan pa Rei. E politikonan korupto aki, bombanan moderno, ta wordu paga pa sweet talk, manipula e pueblo pa despista i hustifika e aneksashon.

Aneksashon kontrario na loke Clark Abraham kier manipula i gaña e pueblo un biaha mas, nunka lo benefisia e pueblo Boneriano. E  Boneriano lo sigui perde tur kos i bira mas pober i na otro banda e Hulandes lo sigui bira riku i bai na possee tur loke ta di e Boneriano awor aki.  Ankesashon ta e siguiente stap despues di 10-10-10 pa legalisa e status ilegal aki  di integrashon den Hulanda i lo bisa ku ta nos mes politikonan ta di akuerdo meskos ku nan a bisa ku nos mes a skohe pa 10-10-10.

E mes politikonan korupto ku no ta respeta nos derechonan i ni referendum, ku a laga Hulanda impone leinan inmoral humiyando i destrui e kultura i dignidat Boneriano, impone leinan den edukashon pa segrega nos yunan i krea apartheid na Boneiru, na Mariadal i ZVK i Colombia matando i kabando ku e Boneriano, laga Hulandesnan Oropeo drenta yena Boneiru pa kaba ku e rasa i pueblo Boneriano ets ets tin kurashi di pidi bo konfia nan i e politikonan Hulandes abusadornan ku nos derechonan i nos futuro.  

E personanan aki ku pueblo a konfia i a traishona nan mes pueblo mester bai na komprende ku awor si nan a krusa e linja, i ku nan no ta politiko mas for di awor, pero a bira enemigu di pueblo Boneriano dor ku  na luga di respeta, proteha i kumpli ku derechonan di pueblo ku ta nan deber a bende i entrega esakinan bek na e kolonisado.  Kolonialismo ta krimen kontra humanidat deklara pa Nashonan Uni i pa informashon na esnan ku a komete e krimen aki ta “vogelvrij” ku otro palabra kada suidadano ta liber i tin e derecho pa usa tur medio ku ta posibel pa sali for di bao di kolonialismo i esaki ta legal segun Nashonan Uni i lei internashonal.

Pa kontra-aresta e akshon ilegal aki nos uniko solushon ta pa kontinua pa sigui trese a situashon di abuso di poder aki na konosementu internashonal, na Komite di Nashonan Uni C-24, Asamblea General di Nashonan Uni, Kortenan i tribunalnan internashonal di  hustisia i derechonan humano i prensa internashonal. Awor ta Solo el pueblo mester salba el pueblo.