Presidente nobo di Cft Raymond Gradus: “Yena funshonnan krusial i maneho na e entidatnan di gobièrnu mester haña mas prioridat”

CFTKolegio di supervishon finansiero di Boneiru, Sint Eustatius i Saba (Cft) durante su bishita na Boneiru dia 3 di òktober a enfatisá serka e kolegio ehekutivo i konseho insular e nesesidat di un ehekushon adekuá di presupuesto (manera yenamentu di e funshonnan klave) i maneho na e entidatnan di gobièrnu. “Ta rekerí kolaborashon i esfuerso di no solamente e departamentu di finansa, sino di tur direktorado, kolegio ehekutivo i konseho insular pa mehorá esaki pronto”, segun e presidente nobo di Cft Raymond Gradus.

Durante e bishita di e Kolegio a papia ku gezaghèber, kolegio ehekutivo i konseho insular. Tambe a hasi un bishita di trabou na kámara di komersio. Cft a laga inform’é tokante un kantidat di desaroyo ekonómiko i e retonan ku e diferente sektornan ta konfrontando. Ademas a diskutí tambe e kambionan rápido di diferente kolegio ehekutivo i diputado pa otro, loke ta resultá den retraso den tumamentu di desishon importante. Presidente Raymond Gradus: “Si no implementá e plannan (na tempu), esei no ta bon pa e klima di invershon, loke ta perhudiká kresementu ekonómiko, loke konsekuentemente no ta bon pa komunidat di Boneiru”.

Ku e diputado di finansa nobo a papia prinsipalmente tokante ehekushon di e presupuesto di 2017 i preparashon di e presupuesto di 2018. Na e okashon ei a trata e intenshon di oumentá e gastunan di personal den e presupuesto di 2018. Tambe a deliberá tokante un palabrashon anterior pa yena vários vakatura krusial. E palabrashon ta ku pa 1 di yanüari 2018 e funshonnan krusial aki lo ta yena. Ademas e diputado a indiká ku lo bin ku plan pa limitá e subida di e gastunan di personal.

Tambe a diskutí e rekomendashonnan den e diferente rapòrtnan pa mehora di e maneho finansiero. E proseso di revishon di e diferente proseduranan i prosesonan a tuma mas tempu ku tabata planeá originalmente. Finalmente a entregá tur e rapòrtnan final tokante e proseduranan i prosesonan i Departamento di Finansa a prepará un plan di implementashon. E kolegio ehekutivo a indiká ku lo pone man na obra ku e plan di implementashon aki pa Boneiru por haña un deklarashon aprobatorio di akountent pa e kuenta anual di 2019. Ademas a trata tambe e kuenta anual di 2016. A entregá e kuenta anual di 2016 muchu lat. Presentashon di e konsepto di presupuesto di 2018 tambe a enkontrá retraso. Presentashon atrasá di e konsepto di presupuesto di 2018 konsekuensia di aprobashon atrasá di e kuenta anual di 2016. E hecho ku e koalishon a kai na luna di yüli tambe a kontribuí na esaki. Pronto lo hasi entrega di e presupuesto di 2018 na Cft.

A para ketu tambe partikulamente na e desaroyo di dos entidat di gobièrnu. E desaroyonan aki lo por tin un impakto importante riba e presupuesto. E kolegio ehekutivo a indiká ku e ta deseá di mehorá e maneho na e entidatnan di gobièrnu aki. Cft kier subrayá e importansia di esei.

Bishita di Cft ku presidente nobo i miembro nobo na nòmber di islanan BES
E bishita na Boneiru dia 3 di òktober tabata e promé bou di liderazgo di e presidente nobo, señor Raymond Gradus. Miéntrastantu a fortalesé Kolegio ku yegada di e miembro nobo na nòmber di Boneiru, Sint Eustatius i Saba, señor Herbert Domacassé. Kolegio di supervishon finansiero di Boneiru, Sint Eustatius i Saba ta konsistí awor di Raymond Gradus, Sybilla Dekker i Herbert Domacassé. Cft ta mira bèk riba un bishita útil na Boneiru.

Pa lo demas Kolegio a ekspresá su sintimentu di konvivensia ku tur persona ku ta sufriendo e konsekuensianan di e kalamidat ku naturalesa a okashoná resientemente na Isla ‘Riba. Cft ta konsiderá ku un bishita na Sint Maarten, Sint Eustatius òf Saba no ta oportuno na e momento aki. Posiblemente Cft lo hasi un bishita separá na Isla ‘Riba na fin di e aña aki.