Pregunta aklaratorio enkuanto investigashon di funshonamentu di sekretario di entidat públiko Boneiru

Renata DomacasseDen un karta fecha 7 di yanuari dirigí na gezaghebber sr Rijna, miembro di frakshon di MPB Renata Domacasse ta hasi pregunta relashona ku e investigashon di secretario di entidat publiko, ku entre tantu ta bek den funshon después di un tempu suspende.

“Den desèmber 2017 Konseho Insular (KI) a risibí e notifikashon ku a reapuntá sekretario di entidat públiko Boneiru (ES) den su funshon ku tur honor. Segun e informashon ta a base di e datonan riba kua a investigá e sekretario, Kolegio Ehekutivo ta di akuerdo ku e investigadó ku e alegashonnan di Kolegio Ehekutivo ta sin base.

Tambe nos ta na altura ku:

  • pa por yega na aprobashon pa un suspenshon mester a haña aprobashon di Representante di Reino – Rijksvertegenwoordiger (RV). RV ta kontrolá e legitimidat i legalidat promé di duna aprobashon.
  • e tarea pa hasi investigashon a ser kambiá despues ku ya a duna aprobashon pa hasi e investigashon.

Hasiendo uso di art. 45 di nos Reglamentu di Òrdu, mi kier a hasi e siguiente preguntanan i ta deseá di haña e kontestanan por eskrito.

  1. Ta Kolegio Ehekutivo mes a start e proseso pa hasi un investigashon riba funshonamentu di ES i tambe pa un eventual suspenshon?
  2. A pidi konseho serka tersera i ken a keda aserká?
  3. Konseho Insular por haña kopia di e konseho aki?
  4. Durante di e suspenshon lo mester a hasi un investigashon. Ken a keda apuntá pa ta responsabel pa e investigashon i tambe pa e maneho di e finansa pa esaki?
  5. Ki tipo di investigashon mester a hasi?
  6. Kiko a kondusí na kambia e tarea original pa hasi un investigashon?
  7. Den e reunion di Konseho Insular nos por a tende dip. Kroon lesa un desishon di Kolegio Ehekutivo (BC-besluit) kaminda a bisa ku mester aserka un ofisina atministrativo forénsiko. A aserká un ofisina atministrativo forénsiko manera disidí den Kolegio Ehekutivo?
  8. A aserká BZK pa ayudo ku e investigashon i remplaso temporal di ES?
  9. Kiko tabata e resultado?
  10. Na momentu ku a kambia e tarea pa e investigashon original, Konseho Insular por haña kopia di e formulashon di e tarea pa e investigashon nobo ei?
  11. Ken òf kua instansia a keda aserká pa hasi e investigashon nobo? A base di kua kriterio a yega na e instansia òf persona ei? Frakshon di Movementu di Pueblo Boneriano – MPB
  12. KE mes ta start un proseso di suspenshon pa hasi un investigashon, ta pidi RV aprobashon pa e suspenshon, na kaminda ta kambia e proseso sin warda e resultado di e investigashon original. Gezaghèber ta haña esaki un muestra di bon gobernashon?
  13. Gezaghèber ta di akuerdo ku dor di e maniobra aki di KE di pidi RV aprobashon pa un investigashon di tal índole i despues ta kambia esaki pa un otro tipo di ‘investigashon’ ta krea e impreshon ku KE ta manipulando i no tin un maneho konsistente i koherente?
  14. Gezaghèber por duna un bista kon e investigashon a kana?
  15. Gezaghèber por a duna un indikashon ku e trayekto di investigashon inisiá ta lòs for di e ouditoria di e aparato públiko?
  16. E resultado di e investigashon ta den un relato? Ken tur a duna komentario ariba e relato aki prome ku a yega na e relato final? Ki dia a entregá e relato aki ofisialmente na KE? KI por haña un kopia?
  17. KI por risibí tur ‘BC-besluit’ i nótulo regardando e suspenshon i e investigashon for di 25 di yüli te ku 20 di desèmber 2017?

18. Gezaghèber por informá KI kon ta bai garantisá bon funshonamentu di ofisina di ES pa futuro?”