Posibel koalishon nobo ku karta pa gezaghebber Edison Rijna

BC-Office-BonaireDen un karta fecha 10 di ougustus i firma pa e 5 miembronan di Konseho Insular, P.J. Kroon, E.J. Bernabela, J.M. Raphaela, M.S.M. Janga i R.C.  Beukenboom dirigí na gezaghebber Rijna den su posishon komo presidente di Konseho Insular, tin komo topiko; reunion públiko di Konseho Insular.

E karta ta relata bisando ku “resientemente Kolegio Ehekutivo a tuma un desishon pa suspendé Sekretario di Entidat Públiko mr. N.M Gonzalez, e argumentu pa hasi esaki aparentemente lo ta basá riba un rapòrt ku e kompania KPMG lo a traha riba funshonamentu di e aparato gubernamental. E rapòrt aki ta resultado di un petishon di Konseho Insular pa un investigashon imparsial di e aparato gubernamental .

E desishonnan di suspenshon ta den violashon fragante di artíkulo 168 di WolBes i nos Reglamentu di òrdu. Kolega Marugia Janga dia 3 di ougùstùs último a pidi algun dokumentu (2017007810) ku Konseho Insular  ke haña promé ku nos próksimo reunion públiko.

Segun vários deklarashon di diputadonan den medionan di komunikashon Kolegio Ehekutivo resientemente a tuma un kantidat di desishon ku ta den violashon di lei i reglanan vigente. Esaki apesar ku dia 31 di yüli firmantenan a hasi un petishon na gezaghèber pa vigilá tomo di desishonnan riba maneho nobo i esnan ku tin konsekuensia profundo pa nos Isla.

Konforme artíkulo 13 di nos Reglamentu di òrdu,  nos ke pidi sr. Presidente pa konvoká un reunion públiko di Konseho Insular pa tuma desishon. Nos ke sugerí sr. Presidente pa konvoká e reunion aki pa Djamars 15 ougùstùs benidero.

E punto di agènda ta:
Maneho di Kolegio Ehekutivo en general i stabilidat polítiko en partikular. 

Nos ke urgí sr. Presidente pa manda e dokumentunan solisitá pa miembro Janga den su karta di 3 di ougùstùs último promé ku konvokashon di e reunion ku nos ta pidi den e karta aki. Tambe nos ke pidi presensia di e tres diputadonan i tambe sekretario mr. N.M. Gonzalez.”

Finalisando e 5 miembronan di Konseho Insular ke gradisí sr. Presidente di antemano.