Notisianan di polis

POLISRiba djabièrnè 29 di sèptèmber, alrededor di 7.45 or di mainta un aksidente di outo a tuma lugá riba Kaya Grandi. E outomobilista di e outo pretu a saka regtenweizer pa kita na man robes pero e outomobilista di e outo oraño no a mira esaki. Ámbos outomobilista a keda heridá. Ambulans a transportá e víktimanan pa hospital pa tratamentu médiko.

Alrededor di 12.20 or di mèrdia a drenta keho di ladronisia di un bateria di outo for di un outo ku tabata stashoná na Kaminda turístiko. E ladronisia a tuma lugá entre 3.15 or i 4.11 or di atardi ora ku e doño tabata sambuyá.

Alrededor di 9 or di anochi a drenta notifikashon ku tin 2 hóben pèrdí na Sorobon Probablemente e 2 hóbennan aki a skapa for di bista di nan lidernan di Kas di Karko. Ta trata di Hendrick Clotida nasé riba 27-04-2007 i Vedion Martina-Dickens nasé riba 17-09-2007. A señalá nan último na Sorobon alrededor di 7or di anochi. Polis a hasi un búskeda pero no a enkontrá e hóbennan. Riba djasabra 30 di òktober alrededor di 8.15 or di mainta a drenta notifikashon na warda di polis ku a lokalisá e hóbennan na Sorobon. Polis den kolaborashon ku otro instansianan konserní ta bai sigui atendé ku e kaso aki. Polis ta gradisí tur persona , instansia i partner, manera Stinapa i Kustwacht, ku a yuda den e búskeda aki.

Riba djasabra 30 di sèptèmber alrededor di 9.50 or di anochi a drenta notifikashon di un “hit and run” riba Kaya Avelino J. Cicilia kaminda un vehíkulo a alkansá un peaton i siguí kore bai. A transportá e víktima pa hospital pa trato médiko, for di kaminda despues a transporte e pa Colombia pa tratamentu médiko mas avansá. E shofùr di e vehíkulo ku tabata enbolbí den e aksidente despues a mèldu su mes na warda di polis.

Riba djadumingu promé di òktober un kiebro a tuma lugá entre 4 or i 5 or or di mardugá den un kas situá na Kaya Carlos A. Nicolaas. Aki deskonosínan a habri e bentana di skùif na banda di e kushina i ku palu di basora a hala e pòtmòni ku diferente bankomátiko bai kuné.

Riba djaluna, 2 di òktober, alrededor di 12.00 or di mèrdia a drenta notifikashon di unaksidente ku herido riba e krusada di Kaya Sinfonia ku Kaya Avelino Cecilia. Shofùr di e outo pretu no a duna preferensia na e outo blou i asina a okashoná e aksidente. Tur dos shofùr a risibí leshon. Ambulans a transportá tur dos víktima pa hospital pa risibí trato médiko.

Mas lat a risibí keho di ladronisia na un lokalidat di sambuyá situá na Tolo. Deskonosínan a kibra e bentana na banda di shofùr i a bai ku entre otro un set di lèns, un brel di bista i bateria di kámara.

Riba djamars 3 di òktober alrededor di 10.30 or di mainta a drenta denunsia di un ladronisia na un supermerkado situá na Kaya Industria. A detené un hòmber di inisialnan M.C.F. den a akto, pa mas investigashon.

Alrededor di 3or di mèrdia sentral di polis a risibí notifikashon di un aksidente  riba Kaya Ir. Randolph Statius van Eps. Un garoshi di golf ku dos turista aden a slep i un di e turistanan a kai for di e garoshi. E víktima a risibí leshon grave. Ambulans a transportá e víktima pa hospital pa trato médiko.

E kasonan aki ta bou di investigashon