Minister Grapperhaus ta bishitá Boneiru i Kòrsou

Minister GrapperhausMinister Grapperhaus (Hustisia i Siguridat) lo bishitá Boneiru i Kòrsou for di djaluna 15 te ku djárason 17 di yanüari 2018. Pa su promé bishita na islanan abou e ta sera konosí ku ministernan di Hustisia di Aruba i Kòrsou.

Deliberashon di kuater partido Hudisial
Durante e deliberashon regular di e kuater partidonan hudisial nan lo papia entre otro tokante e aserkamentu  di krímennan ku tin impakto grandi (high impact crimes), wardakosta i posibilidatnan kon pa sigui ku kolaborashon na momento ku kriminalidat pasa frontera i kombatimentu di terorismo.

Grapperhaus ta ansioso pa sera konosí ku su koleganan di islanan abou pa promé biaha. “Ta di gran importansia pa nos traha huntu oro ta trata di  fortifikashon di mantenshon di órden, vigilansia di frontera i kombatimentu di terorismo. Mi ta konta ku un promé enkuentro plasentero i un bon kolaborashon ku mi koleganan minister di Hustisia.

Boneiru
Banda di e deliberashon di kuater partido Hudisial na Kòrsou, Grapperhaus lo bishitá Brantwer i e prizòn nobo na Boneiru. Tambe e lo hiba kombersashon ku entre otro Gezaghèber, Hefe di Kuerpo, Fiskal Mayor i Koninklijke Marechaussee. E programa di minister Grapperhaus ta kuminsá djaluna mainta 15 di yanüari na Boneiru.

Kòrsou
Riba 15 di yanüari djaluna anochi e ta yega Kòrsou kaminda djamars 16 di yanüari  e Deliberashon di kuater partido Hudisial lo tuma lugá. Despues Grapperhaus lo hiba kombersashon ku Gobernador i Presidente di Korte komun di Hustisia. Tambe e lo bishitá Wardakosta i RST (Recherche Samenwerkingsteam).