Maneho nobo di deklarashon tokante kondukta pa Boneiru

GezagResientemente gezaghèber Edison Rijna a tuma desishon pa formulá i implementá maneho nobo pa Deklarashon Tokante Kondukta – Verklaring Omtrent Gedrag (VOG) ku ta kai bou di responsabilidat di gezaghèber. Revishon di maneho tabata nesesario pa profeshonalisá e proseso, pero tambe pa yega na un balor mas grandi di e VOG.

Un VOG ta un deklarashon ku no tin opheshon kontra un persona teniendo kuenta ku e meta pa kua a pidi entrega di e VOG. Por pidi un VOG por ehèmpel pa oportunidat di trabou, trabou boluntario, pa aktua komo mayor di kriansa òf pa adoptá un yu, muda pa eksterior i pa hasi petishon di pèrmit.

E último lunanan Gabinete di Gezaghèber, huntu ku Ministerio di Hustisia i Siguridat, e Servisio Justis i e Servisio di Imigrashon i Naturalisashon (IND) a traha duru riba mehorashon di e proseso di VOG, formulando reglanan di maneho ku ta regardá e petishon, evaluashon i entrega i pa medio di strukturashon di e proseso. Tambe Gabinete di Gezaghèber a pidi aporte di diferente organisashon na Boneiru pa adaptá e profilnan di ‘screening’ na e funshonnan pa kua áreanan di atenshon ta bálido den e ‘screening’.

Entrante yanüari 2018 e maneho nobo ta bini na vigor. Desde e fecha aki tin algun aspekto ta kambia pa bo komo suidadano òf organisashon. Por ehèmpel: desde yanüari 2018 nos ta traha ku formulario nobo pa hasi petishon, formulario nobo di apoderashon i profil di ‘screening’.

Bo ta risibí un VOG si for di investigashon resultá ku bo no tin echonan kastigabel riba bo nòmber òf si bo echonan kastigabel no ta forma riesgo pa e meta pa kua ta pidi e VOG. Pa por hasi un bon kálkulo di e riesgo aki nos a formulá profilnan di ‘screening’. Uso di profil di ‘screening’ a hasi e formulario pa hasi petishon mas ámplio i e organisashon tin un ròl mas grandi den yenamentu di e formulario. E organisashon ku ta deseá un VOG di e suidadano mester indiká bon kla riba e formulario kiko ta e meta di e VOG i kua ta e áreanan di riesgo ku ta mará na e meta aki. Di e manera aki Gabinete di Gezaghèber por hasi un mihó kálkulo di e riesgo pa entrega di e VOG. Esaki ta kondusí na un balor mas grandi di e VOG i un profeshonalisashon di e proseso.

Gabinete di Gezaghèber, den koperashon ku e Departamentu di Komunikashon, ta hinkando un kampaña di informashon den otro, ku kua nos lo suministrá abo komo suidadano i organisashon ku mas informashon tokante e manera di traha nobo.