Kaso pa igualisashon di AOV deklará no-atmisibel

BijkerkUn notisia tristu pa esnan ku ta stima hustisia. Algun siman pasá nos a risibí e mensahe di nos abogado na Bèlgika ku Korte Europeo pa Derechonan Humano (‘EHRM’) a deklará e kaso pa igualisashon di AOV entre Hulanda y BES no-atmisible. Es desir, nan a disidí ku nan lo NO trata e kaso. Motibu di nan desishon no ta kla. Korte ta djis referí na algun artíkulo den e Tratado, pero eiden tin komo 5 òf 6 motibu. Nos NO sa kua di nan ta apliká den nos kaso.

Nos no por spekulá riba e motibu. Tur Kortenan rònt mundu semper ta obligá pa motivá nan desishonnan na un forma kla y komprendibel. Esei ta un prinsipio fundamental di hustisia. Pero den e kaso aki klaramente e motivashon di Korte Europeo ta defisiente. Den nos kaso Korte Europeo a violá e prinsipio fundamental di hustisia aki, miéntras ku Korte Europeo mes semper ta para ariba ku Kortenan mas abou (esta, kortenan nashonal) mester kumpli ku esei!

Pa Prensa tuma nota di dje, opinion di nos abogado na Bèlgika ta bai athuntu. Tambe kopia di e Desishon di Korte ku pa kolmo nan NO a manda pa nos abogado te fin di ougùstùs último, miéntras ku e desishon ya a kai na mart kaba. Otro fayo serio di Korte Europeo. E dokumentunan aki nos ta publiká tambe riba nos website www.arcocarib.com (riba Front Page, klek riba ‘Second GMS Court Case’).

Problema di no-atmisibilidat ta ku NO tin desishon riba e mérito di e kaso mes. E ta keda kologá na laira. Bo ta ni gana, ni pèrdè. Úniko kos ku bo sa ta ku bo kaso lo NO wòrdu tratá.

Kontrinkantenan di PHU lo por ta kontentu awor, espesífikamente UPB, Demokrat y MPB. Y sindikatonan tambe. For di 2008 nan a hasi nèt nèt nada pa yuda nos kibra e diskriminashon entre Hulanda y BES riba tereno di derechonan soshal/ekonómiko. Y te dia di awe nan no ta ni protestá kontra esaki. Nan kobardia a suak PHU, ku mester a sali na defensa di pueblo riba e punto aki sin niun yudansa di nan. Wèl, awor nan a haña resultado di nan kobardia. Pabien!

PHU a primintí di lo hasi su máksimo esfuerso via di Korte pa drecha e eror fundamental aki den nos struktura estatal nobo, esta e diskriminashon entre Hulanda y BES riba tereno di derechonan soshal/ekonómiko. Te awor nos no a logra, pero nos kaso den Korte Internashonal di Nashonnan Uní ta pendiente ketu bai. E kaso aki ainda por duna nos e resultado tan sperá. Ademas nos ta intentando di haña sa di Korte Europeo ta di kon nos kaso a ser deklará no-atmisible. Si nos no ta haña kontesta, nos ta pensando riba otro akshon. 

Pero un kos ta sigur, pueblo. Si nos ta sigui kobardiá asina, Boneiru lo no bai dilanti.