Hues mr. de Kort a suspende kaso pa mas investigashon

IMG_0036Hues mr. Maurits de Kort ta demonstrando di ta un profeshonal ku konose su trabou i sa debidamente kon pa hasi esaki tambe. Un di su spesialidatnan ta, ku e por domina diferente idioma i sigur esun di Papiamentu. Esaki ta nifika tambe ku e konose diferente kulturanan pa por pone su profeshonalismo huntu ku e cultura nesesario i profundisa kada kaso riba nan mes. Personalmente nos ta rekorda algun otro hues i fiskal di den pasado.

E kaso di e Venezolanonan ku a keda detene dia 2 di februari den awanan rondo di Boneiru, tabata parse un kaso sumamente komplika i asta kisas difisil pa por duna un sentensia legal i konvensiente den esaki, kual lo por a nifiká ku tin di e detenidonan ku por a keda pone den libertat. Sinembargo e pantaya a kambia durante e kontinuashon di e kaso djabierne mainta i ku hgues mr. de Kort a opta pa habti e investigashon riba un dje sospechosonan. Esaki tabata pa e motibu ku durante su ultimo palabra, el a kuminsa buska manera di defendé su mes i hues mr. de Kort a kontinua ku hasi’ele preguntanan relashona ku interogashon di e kaso.

Maske tin ku bisa ku tin di su deklarashonnan tog poko vago, manera e saku pretunan ku tabata kontene droga al final tabata na bordo di e boto kaba ora el a subni abordo; ku e dos personanan ku tabata maneha e boto tabata esnan ku ta formando parti di e kuarteto, ounke e no por a mira nan kara, pasobra esakinan tabata ku maskara durante henter e biahe, etc. Tabata debí na e dudanan aki, ku hues mr. de Kort tog kier a profundisa su mes mas den e kaso aki i a pidi Ministerio Publiko pa investiga e sospechoso aki di nobo.

Loke a bini bon kla dilanti ku tabatin un persona mas na bordo (pues un di 5 persona) ku no a keda haña te awe. Probablemente e droganan i arma di kandela lo por tabata di dje. E abogadonan a mustra ku no por pone konekshon di droga ku intenshon ni motibu di e biahe di nan kliente i e dos otronan ku for di un prinsipio a bisa ku nan tabata piskando ora nan a konfronta un aksidente ku un tanker ku a lastranan trese nan mas serka Boneiru. Pa kolmo Wardakosta no tin nada registra di e boto aki su moveshon, ku no ta e nota di ku tabatin un ‘Go Fast’ den direkshon di Boneiru e anochi enkuestion. Pues no tin sufisiente prueba.

Loke polis a registra ta laga hopi di desea, ya ku no a deskribí kiko a haña na unda i den kiko. Entre otro kiko tabatin den e ‘rugzak’, un dje abogadonan a remarká. E dos sospechosonan Rodriques i Guerrero a keda para ariba ku nan ta piskadonan di profeshon i a sali pa piska. Nan no konose e dos otro Venezolanonan i tampoko sa nada di droga. Ochoa ku ta un persona ku den poasado a keda deporta for di Boneiru despues di tabata pertenese ilegal riba e isla aki, a bisa ku su uniko delito tabata di a purba drenta atrobe ilegal pa bin traha den kunuku di Jason. Tabata su persona ku a invita Gimenez ku intenshonalmente tabata kier a yega Korsou. Ochoa ta haña ku polisnan ta konfundiendo nan kaso ku otro kaso. Si akaso bordo di e boto ku nan a yega Boneiru kune tabatin droga, e sigur no sa di nada di esakinan. E saku di plestik pretu ku ta papia di dje, e no a habri nan pa mira kiko nan tabata kontene pasobra no tabata pertenese na dje.

Tabata e sospechoso Gimenez a brua e kos, ora el a purba di splika hues ku e ta inosente. Polisnan no a haña droga ni den su maleta, ni riba dje (den su poder). Su intenshon tabata pa sigui pa Korsou, unda su famianan tabata sper’é. E tambe ta bisa ku nan a biaha 5 persona huntu den e boto, ku ta parse esun ku polisnan ta mustra riba potret. E ta sigur ku e di 3 persona tambe a baha for di e boto i nan kada unu a baha ku nan pertenensia(nan).

Despues di un analisashon di su interogashon, hues mr. Maurits de Kort a sugeri pa suspende e kaso pa habri e interogashon di Gimenez di nobo. Ounke ku fiskal mr. Starrenburg a bisa ku e team ku a hasi e investigashon ei na februari ya no ta na Boneiru mas, pasobra e funshonario di Kmar a bai bek Hulanda. Sinembargo e kaso a keda suspende pa te ku dia 3 di oktober 2017 pa 10’or di mainta.

E kaso ta hopi interesante.