Forlestu di Famia Raphael Benitho Statie Rodriguez ta stop

16507876_10155009689459116_5869062867219045631_nKarta habri di Forlestu Raphael Rodriguez. “Dirigí na tur medio di komunikashon Sosial Bonaire, Curaçao i Aruba, Obispado di nos Diósesis, Agensia Funerario Nos Consuelo na Bonaire, Outoridat Polisial Bonaire, y Koleganan Forlestu na Bonaire. Promé ku mi a yega asina leu di tuma e desishon aki, mi a pensa hopi, papia ku vários persona den komunidat tantu na Bonaire komo Curaçao, eks Vikario na Bonaire, tambe algun kolega Forlestu, tambe hasi intento na vários okashon pa papia ku e direktor di Agensia Funerario Nos Consuelo na Bonaire sin por a logra y na final di kuenta, mi a realisá mi ku ta e mihó opshon pa mi persona pa stòp kompletamente, kuminsando 1 di Desèmber 2017, ku tur aktividat relashoná ku e funshon di Forlestu.

Dia 23 di Desèmber 2011, mi a fungi promé biaha komo forlestu na Bonaire. Pa e lastu 6 aña nan tras di lomba mi a siña hopi, tantu na Bonaire komo na Curaçao, Aruba, Miami, Habana komo na Sürnam kon pa hasi e funshon aki ku amor y dedikashon. Na aña 2012 kaba mi a realisá mi mes ku tin vários aspekto di e trabou ku aki na Bonaire, sea pa tradishon of pa lei no ta andando manera ta preskribí. Tabata e intenshon pa mi tene un rueda di Prensa, pero komo mi ta den eksterior pa motibunan personal, mi a disidí di emití e komunikado aki.

Tin 4 rason pa mi desishon: 1.Obispado E trabou di Forlestu, nombramentu, i mayoria di ritonan ku mi lo elaborá over di dje ta únikamente pa e Religion Katóliko.) 2. Agensia Funerario Nos Consuelo 3. Outoridat Polisial na Bonaire 4. Eks Koleganan Forlestu. Obispado No muchu despues ku mi a kuminsá fungi komo Forlestu, mi a manda un karta pa nos Obispu Mgr. Secco, unda mi a pidié ofisialmente pa nombra mi y alabes kisas e otro forlestunan di Bonaire ofisialmente pa por ehersé e trabou di Forlestu. Manera mi a indiká kaba, den e manual pa Forlestu y segun e direktorio katóliko, un entiero den un santana Katóliko NO por tuma lugá, sin un Forlestu, apuntá pa Obispado. Esaki di akuerdo ku e Manual pa Forlestu, preskribí pa Obispado di nos Diósesis.

E direktorio/manual pa Forlestu ta bisa tekstualmente lo siguiente: “Aseptashon di un persona komo kandidato pa e funshon di Forlestu ta enserá lo siguiente: Ø Forlestu ta keda nombra dor di Obispado pa un tèrmino di sinku (5) aña, teniendo kuenta si ku edat i salú di e Forlestu Ø Un periodo di prueba di seis (6) luna Ø Nombramentu ta pa un durashon di sinku(5) aña Ø Evaluashon di funshonamentu di e kandidato kada aña “ Pa e otro religionnan aki na Bonaire, te asina ku mi por a averiguá, NO tin un manual unda e proseso aki ta ankra den dje. Si ta kustumber pa añanan largu ku tur religion ta hasi uso di e funshon di un Forlestu. Aparte ku un biaha nos Ex Vikario a bisa mi ku nos tin ku planifiká esaki, nunka mi nos a tende nada di nos Obispu pa 6 aña largu. Ku otro palabra, tur e Forlestunan di Bonaire ta hasiendo e trabou di Forlestu, sin ta nombrá ofisialmente pa Obispado. Personalmente mi ta haña esaki algu ku no ta kuadra ku e pensamentu di nos Diósesis. Pastor nan tampoko ta hasi nan máksimo esfuerso pa atendé ku entiero di Defuntu segun ta wòrdu ferwagt di nan.

Den pasado mi a komprondé ku e proseso tabata kuminsá na ora di malesa, birando mas fuerte ora e persona fayesé. Famianan tabata regla dia, ora y lugá di entiero huntu ku Pastor y agensia funerario. Na Bonaire awor a bira ku kasi tur ora Famia y Agensia Funerario ta yega nan akuerdo di dia, lugá y ora y despues ta aserka pastor pa rekonfirmashon di esaki. Tin biaha asta pastor ta lesa den korant ki dia tin entiero den su Parokia i den su Misa. Despues di un par di insidente Pastor nan a disidí di saka e asina yama: Pèrmit di Parokia.

Tambe mi ta haña ku Pastor nan lo por hasi un mihó trabou, direkto f via nan asistentenan pa enkurashá persona nan pa tuma un despedida digno ku un S.S. di Misa den un Misa, enbes di un respòns den un otro sala pafó di Misa. E ta mas bunita pa tuma último despedida den un Iglesia i mas aun den kualkier Iglesia e ta Sali MAS barata tambe pa e famia, mirando e tantu oranan ku ta pasa for di e oranan di kondolensia te na e sirbishi. Mi no sa ta na unda a sali e tendensia ku na Misa ta mas karu.

Otro puntonan ku mi a skirbi Obispado over di nan durante di e 6 aña nan tabata: Kon pa atendé ku Eutanasia – etimológiko bisá ta nifiká den tempunan pasa – Morto lihé sin sufrimentu pisa Kon pa atendé ku Ritualnan/Kreensianan/Kustumbernan di nos pasado den Misa, na kas i den Santana Kon pa splika ora di Kremashon. (pa hasi S.S. di Misa PROME ku krema e defuntu) Posibilidat pa hasi Santu Sakrifisio di Misa ku e kaha habri en bes di será Biramentu di e defuntu “kara” pa altá durante S.S. di Misa Agensia Funerario Nos Consuelo Promé ku mi a fungi komo Forlestu na Bonaire, mi a wòrdu pidi dor di Agensia Funerario Nos Consuelo pa kore waha di morto. Mi a hasi esaki ku plaser i honor pa vários luna, te ku dia 21 di Desèmber 2011, dor ku no tabata tin Forlestu disponibel pa dos entiero na Bonaire, e mesun un Agensia Funerario a pidi mi pa fungi komo Forlestu pa un entiero na Parokia di Playa dia 23 di Desèmber 2011. Komo ku na Bonaire te ainda ta tradishon ku ta FAMIA ta skohe Forlestu, for di promé instante aparentemente lo mi a kai na agrado di e Pueblo di Bonaire komo Forlestu.

Na e momentu ei mi a disidí dos kos: 1. Mi kier mustra mi gratitut pa e eskoho y konfiansa den mi persona 2. Mi tabata kier mesora pa tur hende sabi ku e trabou di forlestu ta pa fungi komo un ayudo pa e famia ku ta paga pa e funshon. Na mi humilde opinion, mi sa sigur ku for di e momentu ei Agensia Funerario Nos Consuelo, a maldishoná e momentu ora ku nan a pidi mi pa fungi komo Forlestu.

Den TUR aspekto mi a kuminsá yuda e Famia, ku a kaba pèrdè un ser kerí i ku mayoria bes no tin e “kabes” e momentu ei Mi a kuminsá hasi tur sorto di sugerensia na Famia pa e.o.: § Pa redusí gastunan nan di entiero innesesariamente (sinta en bes di korsage, no usa sigá, evitá di tene kondolensia un dia promé ku entiero, komo ku práktika ta mustra ku 84.7% di e personanan ku bin e kondolensia e dia promé ta bin e dia di entiero atrobe. § Pa verifiká grandura di nan Kèlder promé nan kumpra e kaha di morto pa sa sigur ku e kaha ta pas aden. § Pa hasi uso di SS di Misa o Sirbishi na Misa o Iglesia. § Pa mantené si ta posibel ritualnan di nos kultura y grandinan § Ku mi mes ta kobra Famia, despues ku e Famia a konkluí kiko nan kier pa mi hasi pa nan. § Laga traha un kèlder den un Santana en bes di hür etc. Etc. I asina mas kos. § Pa sali na tempu for di Kasa Mortuario pa yega Misa/Iglesia na TEMPU, pa kuadra ku anunsio di den korant.(tambe pa Famianan adaptá nan orario den Korantnan lokal pa no koinsidí ku inisio di Sirbishi o S.S. di Misa, manera ta e kaso te ainda. Ehèmpel: Kondolensia di 14:00 pa 16:00. Pa 16:00 lo tin un Santa Eukaristia. § Ora ku personanan yega 16:00, manera ta indika den korant, kaha ta sera kaba pa Santa Eukaristia kuminsá. § Despues ku mi sugerensia a sali na klaridad of e aktonan a wòrdu divulgá , mi no a wòrdu pèrmití mas pa: § Kore den e waha di morto di Agensia Funerario (otro koleganan si por a keda hasi esaki) § Kana dilanti di mi entieronan(un otro forlestu si por a sigui hasié) Asta un mintira grandi a ser trese dilanti ku HOPI HENDE a reklamá ku mi kanamentu riba kaya tabata stroba tráfiko enorme. Ora mi mes a bai medio nan di komunikashon, 1023 persona a reakshoná, tantu di Bonaire komo Curaçao, Aruba i Hulanda, unda tambe mi a kana dilanti di entiero ku nan ta apresiá esaki i ku nan NO ta mira un problema. (ta un kolega Forlestu so a hala mi atenshon ku otro tempu tabata permití pasobra no tabata tin hopi outo na Bonaire) § Gerensia di Kasa Mortuario a saka mintira na 3 okashon ku Agensia Funerario tin pèrmit di Kuerpo Polisial pa pasa den verboden ora di entiero. Ora mi a verifiká, NADA no tabata bèrdat. (Mi otro koleganan si a sigui pasa den verboden) § Tambe a prohibí mi pa yega tempran na Kas Funerario. Mi mester a tuma e Defuntu pafó di porta di Kasa Mortuario, hasta si tabata posibel tum’é na Misa/Iglesia. ( segun Agensia Funerario, mi presensia na Kasa Mortuario tabata stroba Famianan di Rou nan defuntu.) Te asta awe mi NO ta komprondé esaki. § Sinta ku mi papel nan ku mi tabata usando komo programa pa e famia por tene nan mes na ora durante di kondolensia i/o entiero. § No tabata posibel mas pa hasi un orashon PROME ku sera kaha na Kasa Mortuario, ni na otro momentunan ku si mi tabata hasié den pasado. (otro forlestunan si por a sigui hasié)

Kuerpo Polisial
Manera mi a trese dilanti kaba, for di un prinsipio, mi persona tabata kontra e pasamentu ku kortejo fúnebre den verboden. Tantu na Parokia di Rincon (pasando dilanti di e Bar di Famia Pourier komo na Playa mei mei di kasnan di Famianan Mercera y De Jongh, e pasamentu den verboden por tabata tin su konsekuensianan. DANKI Dios nada no a pasa. Ora ku mi a trese dilanti ku ami si no ta pasa den verboden, na 3 okashon Agensia Funerario a trese dilanti ku nan ta poseé un pèrmit pa esaki. 2 kolega forlestu tambe a bisa mi ku nan tin e pèrmit aki. Ora mi tambe a bai buska un pèrmit igual, tantu Gezaghebber Reina, hefe lokal di Polis, Agente Ferry Baks e.p.d. na tres okashon a pèrdè tur su tempu buska den dokumentunan polisial y tambe Mayor Abrahams no por a haña un informe ku ta indiká ku kortejo fúnebre tin mag di pasa den verboden. Na un okashon Agensia Funerario a bisa un kolega Forlestu, ku si e haña but serka Polis, trese Agencia y ku Agensia Funerario lo paga e but pa nan. Mi ta spera di kurason ku nada lo pasa nunka ku un di mi koleganan Forlestu ni ku ningun persona durante pasamentu den verboden. Mas aun, mi kier a hasi un yamada pa di 4 biaha na Gezaghebber y Agentenan Polisial pa stòp e pasamentu den verboden aki promé ku algu pasa.

Kolega Forlestunan
Ora ku mi a forma parti di e kolegio di Forlestunan na Bonaire, mi a trata mesora pa krea un union pa ku e trabou. Mi tabata pensa ku union ta hasi Forsa. Pero tur mi esfuersonan tabata enbano. Prinsipalmente pa atendé ku Famia ku ta paga nan pa yuda nan den nan tristesa. Kuantu biaha e famia lo tabata kier sugerencia pa nan entiero? Kuantu bia e famia nan a pasa bèrgwensa pasobra kaha di morto no tabata por a drenta kèlder pasobra e kaha skohe tabata muchu grandi? Kuantu biaha famianan ta yega na Santana y no por sera nan kèlder pasobra sea no por haña e restunan mortal ku a wòrdu saka anteriormente òf forlestu no a koordiná ku e serado di Kèlder? Kuantu biaha mi koleganan ni tabata na altura na unda e kèlder pa dera e defuntu tabata situá? Kuantu biaha no tabata tin ningun sorto di komunikashon entre mi koleganan y e serado di kèlder, ku tur e problema ku esaki a trese ke n’e? Na final di kuenta, e defuntu a wòrdu pone si den su último lugá di sosiegu, e famianan a pasa un tiki bèrgwensa, pero mi koleganan ta keda insistí ku tur kos ta O.K. O.K. Pero ta esakinan ta pasa ora ku no tin mas eskoho.

Resumiendo tur aki riba menshoná, mi a saka mi konklushon ku mi lo no por ta parti di e TEAM di Forlestu aki i mi ta stòp di traha komo Forlestu di Famia.

Mi kier a gradisí Tata Kreador pa e don ku e a duna mi pa por a hasi e trabou aki durante un periodo i tambe un danki póstumo na mi Mama Stima Defuntu – Dios deskanse – Doña Rosa Statie Rodriguez e.p.d., pa un di su pashonnan, ku mi a kopia for di dje: yuda, sin spera nada bek. Un Danki di kurason un biaha mas na tur e famianan ku a depositá nan konfiansa den mi persona den e seis aña nan tras di lomba pa dirigí den nan nòmber, e ritonan funebre pa hiba nan ser kerí na nan último lugá di sosiegu. Esaki for di mi promé entiero dia 23 di desèmber 2011 te ku mi último, den final di Òktober 2017.

Lokual ku ami, Raphael Benitho Statie Rodriguez, e forlestu di Famia di 2011 te ku 2017 semper a para pe ta: “Ku konsuelo di e famia den nan tristesa i dòlò tabata mi mayor preokupashon, pasobra tur, pero tur persona, no ta importá: edat, rasa, kultura, riku òf pober i bou di ki sirkunstansia ku e a fayesé, meresé di haña un entiero, un delaster ayo, ku tur dignidat i rèspèt, meskos ku mi a hasi pa tur defuntu ku mi a atendé ku n’e i ta spera di hañá pa mi mes persona.”