Fèfè Raphaela: Kometiendo fayo trai fayo, James Kroon ta demostrá di a para bira un dekadensia polítiko

fefe-r-copyJames Kroon hamas i nunka ta siña. Esei ta opinion di Alfred (Fèfè) Raphaela, kampañadó di mil kampaña den e bario di Nikiboko i besindario. Sr. Raphaela ta mustra riba esfuersonan di sr. Kroon i Beukenboom ku a hasi por todo pa bòikotiá e reunion públiko di konseho insular pa stroba e promé kambio di presupuesto di e aña aki pa esaki no pasa, pa asina e gobièrnu nobo no tin fondo pa traha kuné pa entre otro asfaltá kamindanan. Mi ta invitá e kombinashon mankaron di patia pa pasa dilanti Telbo bai ariba i mira ku nan propio wowo kon bunita e kaminda ta keda sin ku ni sikiera e ta kla ainda.

Un otro miembro di e kombinashon di patia pashumá ta Marugia Janga.
Marugia ta biba na Playa pero ta Rincon so e kier defendé. Nunka sra. Janga no a papia di un programa di gobernashon di e kombinashon di patia i kasi un aña a pasa sin ningun programa di gobernashon. Apénas 100 dia a pasa ku un gobièrnu dinámiko i fresku a sinta, ata sra. Janga ta kritiká e programa di gobernashon ku den su bista ta karesé di solushonnan. Unda sra. Janga tabata ta último aña anto? Kiko e ta hasi tur dia sintá den kamber di frakshon di partido Demokrat? Ta ku rason den e último reunion di konseho insular, diputado den Heyer sin skaf nada nada a hisa buta i bisa ku awor si tin un programa di gobernashon te ku esaki por keda lesá speshalmente dor di sra. Janga pasobra e sa kaba ku ni Beukenboom ni Kroon lo no lesa e programa di gobernashon.

Hasta un matutino a trese den su kolumna redakshonal dilanti ku bo por bisa kiko ku bo ke, pero tin un airu fresku ta supla den gobernashon di e isla aki. Kuantu mas bon propaganda un gobièrnu lo por ke, sr. Raphaela ta puntra su mes. Segun sr. Raphaela shete di e nuebe miembronan di Konseho Insular a bai te Saba pa siña kon mester funshoná komo representante di pueblo i no sinta so gana plaka di pueblo den kamber di frakshon ku erko haltu haltu sendé. Ni yega nan no a yega Boneiru ku esun ku no a bai, esta sr. Kroon den kombinashon atrobe ku esun ku si a bai Saba, ku ta sr. Beukenboom, ta manda pidi un reunion públiko pa diskutí e programa di gobernashon. Ni sinta e diputadonan no a sinta na drechi. Keriendo ku nan lo por a brua kos, e diputadonan, segun sr. Raphaela balentemente a kontestá preguntanan klarito klarito, demonstrando sin duda ku nan ta sumamente kapasitá i no ta kore pa weganan polítiko bieu. Es mas, e kombinashon di patia ta pidi reunion públiko pa diskutí e programa di gobernashon, i ta lubidá di invitá kolegio ehekutivo. Pa demonstrá kon bruá nan ta segun sr. Raphaela.

Por último sr. Raphaela ta di opinion ku sr. Kroon mester pidi despensa na e bario di Nikiboko i Tera Kòrá en general i famia Clarinda en partikular. E tabata sa masha bon ku a kita sèn di e presupuesto pa e parke di Lalan Clarinda pero a disidí pa sigui tòg ku e show pariba di kas di e defuntu pa motibunan polítiko. Den e 10 lunanan di e gobièrnu di patia, ningun esfuerso sr. Kroon no a hasi pa buta e sèn bek riba presupuesto pa sigui ku e parke. Ta laga te ora ku gobièrnu di patia a bai kas pa riba lomba di mucha di bario sra. Nunu Raphaela, bin ku e bendita parke atrobe. Sr. Kroon no tabata sa ku e tereno no tabata di gobièrnu? Awor kier tira falta riba ámtenarnan di DROB ku a konseh’é robes. E pober no sa ku ta señora di su partner den e koalishon mankaron di patia ta hefe di ámtenarnan, pero manera m’a a bisa den prinsipio, hamas i nunka sr. Kroon lo siña, i mihó e keda ketu pa e no mester sera akuerdo atrobe ku Ministerio públiko, pasobra papelnan a pasa atrobe ku firma riba nan te ku a inougurá e bòrchi pariba di e defuntu su kas. Un despensa na famia Clarinda ta na su lugá segun sr. Raphaela ta terminá bisando. Te aki un komunikado emití pa Alfred “Fèfè” Raphaela na medionan di komunikashon.