Enkuentronan pa Hende Hòmber

received_10208664730056279

received_10208664781937576Sentro Hubentut i Famia (SHiF) tin komo grupo di enfoke mayornan ku tin nan yunan entre 0 pa 19 aña. Ora ta atendé ku mayornan, mayoria biaha ta mira e mamanan, pero mas i mas SHiF ta stimulá e tatanan tambe pa nan partisipashon aktivo den famia. Netamente esaki a duna empuhe pa selebrá pa promé biaha e Dia Internashonal di Hende Hòmber, fechá 19 di novèmber.

Sra Mimi Dongen a elaborá riba e ròl di e hende hòmber den famia i komunidat. Sr Willam Evertsz a papia riba e balor i poder di e hende hòmber. Esnan ku tabata presente a bai kas empoderá i a hasi petishon pa nan por invitá mas hende hòmber pa bin skucha e charlanan.

SHiF a hasi esaki posibel dor di organisá dia 29 di novèmber un anochi kaminda mas hende hòmber tabata por a partisipá. Esnan presente a pidi pa bin ku mas enkuentro spesífiko pa e ser maskulino den futuro serkano.

received_10208664730056279E puntonan ku a bin dilanti ta ku e hende hòmber no tin ku deskurashá anke tin hopi preshon. Tambe ku tin ku balorá bo mes komo hende hòmber, sigur despues di frakaso, òf e importansia di konektá ku otro hende hòmber i kompartí informashon ku otro.

Esnan presente a duna diferente tópiko riba kua nan lo tin e deseo pa haña mas informashon, entre otro: kon tene un famia uní, kon pa atendé ku sèn, òf kon pa dil ku emoshon.

Pa aña 2018 SHiF lo tin sigur diferente enkuentro spesial pa hende hòmber pa duna e ser maskulino su balor i pa stabilisá i fortifiká famianan di Boneiru.

Pa kualkier pregunta òf sugerensia, por tuma kontakto ku SHiF na telefòn 715-7200, òf por pasa na Kaya Princes Marie 7.

Tambe tin posibilidat di tuma kontakto via nos página di Facebook: Shif Bonaire, òf via mail: info.cjgbon@cjgbon.com.