Daisy Coffie (MPB) por lo pronto ta hala tras for di Konseho Insular

Daisy Coffie picMotibunan personal familiar a okashoná ku sra Daisy Coffie, lider di frakshon di MPB, ta disidi pa por lo pronto hala tras for di Konseho Insular di Boneiru. Sra Coffie: ‘Den bon konsulta ku direktiva di MPB mi ta hala tras komo miembro di Konseho Insular i komo lider di frakshon di MPB. Na e momentunan aki mi tin ku duna prioridat na i hinka tur mi energia den e parti familiar ku ta eksigí tur mi atenshon por lo pronto. Mi lo keda duna mi aporte te kaminda ku por na organisashon di MPB.’

Remplasante
Den un karta dirigí na lider di partido MPB i na presidente di direktiva di e partido sra Daisy Coffie ta partisipá su desishon i alabes ta ekspresá su deseo pa un remplasante huramentá durante e próksimo reunion di Konseho Insular. Segun sra Daisy Coffie e hecho ku e ta hala tras por lo pronto for di Konseho Insular ta kuadra tambe ku e vishon di partido MPB pa duna espasio na otro miembronan di MPB pa aportá na frakshon di MPB den Konseho Insular i di e forma aki MPB ta logra krea mas lider ku ekspersensia. Konforme palabrashon den partido sr Edison Ellis ta e kandidato ku den e kaso aki mester drenta Konseho Insular pa MPB. Sinembargo t’asina ku sr Ellis, tambe pa motibunan familiar, tin ku permenesé e próksimo lunanan den eksterior i pa e motibu ei na e momentunan aki no por yena e vakatura ku a surgi. Esaki ta trese kuné ku e siguiente kandidato ku eksperensha ariba e area sosial riba lista di MPB pa drenta Konseho Insular ta sra Renata Domacassé. Sra Domacassé ya kaba a aseptá e reto aki.

Strukturashon di partido MPB
Entretantu e proyekto di strukturashon di partido MPB, riba inisiativa di sra Daisy Coffie, ta kanando. Pa luna di ougùstùs i sèptèmber tin kontinuashon di seshonnan di kapasitashon planiá. Tambe ta hasiendo preparashon pa kuminsá ku un evaluashon di funshonamentu di partido den su totalidat. A base di resultado di esaki lo hasi  ahustenan nesesario ku mester kondusí na fortifikashon i stabilisashon di e organisashon di MPB pa por kumpli ku su metanan, kual ta hiba politika nobo na nivel i Bon Gobernashon.

Gezaghèber
Awe mainta sra Daisy Coffie pa medio di un karta a pone gezaghèber di Boneiru i alabes presidente di Konseho Insular, sr Edison Rijna, na altura di e echo ku por lo pronto e no ta forma parti mas di Konseho Insular di Boneiru.

Direktiva di MPB ta gradisi sra Daisy Coffie pa e trabounan desplega te na e momentonan aki na partido i pueblo Boneriano i ta desea sra Daisy Coffie forsa ku su situashon personal/familiar i ta sigui konta ku sra Daisy Coffie su aporte na e manera ku por den e temporada binidero.