Boneiru komo un di e tòp 100 destinashonnan duradero

SD-Top100-2017-round-1024x1024Pa di tres bia, riba Dia Mundial di Turismo 2017, a divulgá e Tòp 100 destinashonnan duradero i pa di dos bia konsekutivo Bonaire ta riba e lista akí.

E premionan ta un rekonosementu na e esfuersonan di destinashonnan turístiko pa bin ku inisiativanan turístiko responsabel i duradero. Esnan ku a hasi nominashonnan mester a suministrá informashon ekstenso tokante e destinashon i e esfuersonan ku nan mes i nan stakeholdernan ta hasi pa ta mas duradero na benefisio di bishitantenan, nan komunidatnan lokal i mundu. Mester a duna e informashon tokante te kon leu e destinashon ta kumpli ku e 15 kriterionan prinsipal di e ‘Green Destinations Standard’. A risibí 155 nominashon di 57 pais. Tur nominashon a keda evaluá pa ekspertonan di e tim di ‘Green Destinations Top 100’ i miembronan di e komishon spesial di selekshon Top 100 ku tabata enserá mas di 60 eksperto di turismo duradero.

E inisiativa di Tòp 100 ta dirigí riba dunamentu di rekonosementu na destinashonnan turístiko ku a traha duru pa destaká i ta tuma durabilidat na serio. Sinembargo, ningun destinashon ta totalmente duradero. Den tur e destinashonnan selektá tin tópikonan importante ku mester solushoná. Pa motibu di falta di dato, no a tene kuenta ku datonan di emishon di karbon di biaheronan te na e momentunan akí den e kompetensia akí. Sinembargo, Green Destinations ta rekomendá biaheronan pa evitá biahenan largu i pa kompensá nan emishon di karbon na un manera apropiá.