Bon akohida durante parada di blas

pic pa korantEn konekshon ku e kampaña di Gosa Konsiente den karnaval, Sentro Hubentut i Famia (SHiF) a organisá djabièrnè 2 febrüari un parada di blas. E parada a kuminsá na SHiF i terminá den Wilhelmina Park. Na e parada por a mira i disfrutá di diferente gruponan di  trai mèrdia, krèshnan i mayornan huntu ku muchanan ku a bin bon prepará ku nan pèchi, brel di solo, awa, algu saludabel pa kome i ku nan dòpi orea.

Promé ku e parada a sali koleganan di Fundashon Kuido pa Bista i oido tabata presente pa duna informashon i instrukshon kon pa bisti dòpi di orea. Despues Direktor di SHiF señor Palm a trese su spich relashoná ku e importansia di e kampaña Gosa Konsiente i seguidamente Diputado Cicilia tambe a trese su spich di enkurashamentu pa tur hende kòrda Gosa Konsiente i  pa mayor/lidernan sòru bon pa nos muchanan.  Diputado a hasi inisio na e parada i a djòin ku su yunan i esposa. 

Koleganan di FKBO tabata kana i midi e desibèl pa asina mantené e zonido na nivel aseptabel pa e oido. Organisadónan di Klave tambe a duna un bon sosten, i nan a guia e parada i sòru pa tur kos kana bon. 

Sentro Hubentut i Famia lo sigui ku e kampaña “Gosa Konsiente” durante henter aña i asina sigui informá i konsientisá riba kuido i protekshon di muchanan na momentu di aktividatnan ku ta wòrdu organisá.

Pa mas informashon tuma kontakto ku nos na: 715700, puntra pa Mientje Nicolaas òf Carla Oleana.

Pa wak resultado i pòtrètnan di e parada di blas por subi nos Facebook page: Derecho Di Mucha Bonaire òf Facebook: Shif Bonaire.

Por pasa tambe libremente na Sentro Hubentut i Famia na Kaya Princes Marie nr. 7.