Basta kaso di korte no ta kla pa keda trata

sala di hustisia copyAyera tabatin tratamentu di kasonan den korte di hustisia i mester bisa ku hopi di e kasonan a keda presenta Proforma. Esta ku nan no ta kla pa keda trata kompleto i komo e tempu di detenshon di e sospechoso a yega pa e bai dilanti korte ta present’é numa, pero sin trata e kaso ku kontenido. Esaki ta mustra un parti tog di preokupashon, ya ku e mesun kasonan aki ta tuma espasio pa otro kasonan keda trata den e proksimo fechanan di tratamentu di kaso i asina kada biaha lo bai sigui tarda kasonan pa wordu atende den korte ku mas rapides.

Nos no ke bisa ainda na unda e fayo ta sinta, pero tin algu ku no ta saludabel si riba un atardi ku nos tabata presenta pa kubri kasonan penal, a tuma nota ku aparte di un kaso ku a keda trata sin e akusado presenta, tur demas kaso di e atardi a keda presenta Proforma. Por hasi menshon aki di un kaso kontra e homber E. Wout sospecha di atrako arma i posishon di arma di kandela. Tambe kombina ku kiebro den un kas na Sabadeco. Esaki a bai awor pa 16 di november 2017 pa kuartu pasa di 10’or di mainta.

Otro kaso ku a keda presenta Proforma ta e kaso kontra di P. Theodora. E homber aki ta sospecha di ladronisia i tambe posishon di arma di kandela. Parse ku e tabata kumpra i despues bende arma di kandela, kual tantu Ministerio Publiko komo Hues tabata konsidera un delito grave.

Su abogado mr. Winkel a purba konvense Korte pa e por a haña suspenshon di su kaso en espera di tratamentu di esaki, pero Hues a mustra ku e lokenan a keda presenta di karta di solisitut pa trabou i posibel kurso ku e lo bai sigui no tin penso ku si enberdat el a haña trabou of aseptá na e kurso, etc. Esaki a hasi ku Hues a ninga e petishon pidi pa e abogado. Aki 6 siman e kaso aki lo keda trata, kual ta riba 22 di november kuartu pasa di 4’or atardi.

E kaso kontra e homber O. Passial tambe a keda presenta Proforma. Esaki a keda programa pa 6 di desember 2017 pa 2’or di atardi.E sospechoso ta wordu akusa di kiebro den kas na Nikiboko Zuit i tambe violensia domestiko. E tabata den kompania di un otro kulpabel ku ambos lo tin ku presenta dia 6 di desember den korte. No sa kiko e abogado lo bai hasi pa ku petrishon di suspenshon di su kliente mirando ku su ko-kompañero ta den libertat.

E ultimo kaso ku tam,be lo keda trata dia 16 di november proksimo pa 2’or di atardi, ta kontra di R. Janga. Esaki tra un kaso ku a bini for di Hulanda, unda ku atraves di delitonan kriminal nan ke kobra e akusado alrededor di 20 mil doler. Den e kaso aki tabatin vehikulonan  (3) envolvi, sea ku a keda horta bendé of parti di nan. Tampoko ta un kaso ku a keda trata ku kontenido, ya ku e akusado no tabatin un abogado. Primeramente e tabatin unu, pero esaki no a kontinua i el a bai buska un otro. E ta den poder di un dossier di por lo menos 400 pagina, kual nos ta kere e abogadonan ta bula pipa pe. Finalmente el a logra mr. Anthony Nicolaas ku ta bai laman kune.

Pues e atardi, salvo na un kaso ku a mira su tratamentu ta komo ku e akusado no tabata presen te den sala i a trata e kaso, manera nan ta bisa den termino hudisial; ‘op stuk’. Fiskal a presenta e kaso i e kastigu i Hues a bai di akuerdo ku esaki.