Arthur  Sealy: Usa boso talento i no skondi’é bou di tera

Arthur Sealy copy“Ora tin aktividat folklóriko manera: Maskarada, Simadan, San Juan i San Pedro bo ta tende ku Rincon ta kuna di kultura di Boneiru. Mi pregunta ta: Ta ken ta e kunukeronan ku a kultivá Rincon. Si kuminsá ku e katibunan ku a planta maishi por mira ku despues di tempu a bini diferente tipo di maishi manera “Dayochi” ku sigur ta un maishi importante. Pero kunuku Rincon a produsí hopi maishi importane manera, Broertje Janga, Minguel Pourier, Ciro Bernabela, Nechi Crestian, Tavio Sint Jago i esnan ku a funda Sociedat San Antonio di Padua. Asina mi por sigui menshoná: e maishinan, e  kantadónan di simadan i e wardadónan di kosecha.

Tin maishi ku t’ei i tin ku a bai pèrdí. Dikon ta diskuidá monumentonan manera: e monumento na Ser’i Diabel, Parke Nemencio Winklaar, Bustu di Broertje Janga i e piedra dilanti misa.Ta balornan no tin pa e kultura di Rincon òf pa e habitantenan? Dikon e monumento dilanti Misa di Rincon ku ta mustra ku na 2027 ta kumpli 500 aña ku a funda Rincon no ta haña e atenshon nesesario? No ta kòrda ku tabatin un delegashon di Spaña  spesial pa e akto di ponemento di e pidera huntu ku hefe di SKAL? Rinconeronan boso tin tres luna i mei pa prepará i eksponé, riba Dia di Rincon e kultura di kua boso i henter Boneiru ta orguyoso.

Un baluarte di Rincon ta perkurá pa un Simadan modernu den kayanan di Playa. Usa boso talento i no skondié bou di tera. Hesus a rabia ku e esun ku no a usa su talento pero a preferá pa hinké bou di tera. Por fabor no bai hòrta kabritu, no traha kosnan di pal’i maishi, ni di palèt, no entregá sambarku na baluartenan, nan meresé kos bon i bunita, no keda kologá na i den pasado pa motibu ku kultura ta algu dinámiko. Alsa boso bario, sali for di e imahén ku Rincon ta apart. Integrá den ekonomia Boneriano pa mas prosperidat i bienestar di boso bario kultural. No keda pretendé ku Rincon ta kapital. Ta algu chistoso sin ningun balor agregá.

Kiko a para di e Galeria di Baluertenan? Mester traha riba un Galeria modèrno den Rincon ku tur persona importante di Rincon i di tur otro bario. No sea egoista. Mester por haña supsidio -no ko’i kens di $10.000,- pero kapital pa kos grandi bunita i modèrno. Nos ta parti di Hulanda ku ta dispuesto pa yuda, basta ta un bon proyekto hinká den otro.Un proyekto ku kulminashon na 2027. No laga pa na último ora manera sèmper.

Awor mi ta komprondé dikon Elisa Sealy-Sint Jago mi mama, un muhé di Rincon di kua mi tin 50% sanger rinconero, a bisa: “Dia mi muri no dera mi na Rincon”. Di su 8 yunan 4 (50%) ta kasá ku rinconero. Nos ta di famia: Cicilia, Goeloe, Janga, Jansen, Kroon, Martijn i Trinidad di Rincon, sobra ta di Barbados. Clement “Pa Kleman” Kroon, ruman di “Pa Boshi” ta mi welo i Tavio Sint Jago ta mi padrino, pues no laga mi sigui kritiká.”