Arthur Sealy ta puntra: Kua direkson ta bai, di guera, simpatia, odio, vengansa òf dialogo

Arthur Sealy copyDi akuerdo ku Arthur Sealy, ta for di 2010 ta tende ekspreshonnan manera: Pueblo mester lanta, pueblo mester lanta para, pueblo mester sali pa su derecho, a mara Boneiru manera yuana, a rekolonialisá Boneiru, bonerianonan ta hendenan di segundo grado, Hulanda ta disidí, Boneiru ta di bonerianonan. Segun Sealy, ta ekspreshonnan di grupo, persona i instanshanan ku no ta di akuerdo ku e struktura nobo di Boneiru. Ta na kua pueblo e gritunan aki ta dirigí òf na kua grupo i kontra ken òf kontra ken mester oponé.

“E reakshon den komunidat ta desapuntante pa e grupo, persona i instanshanan ku ta hasi e yamada. Por konkluí ku e polítika akí no ta funshoná pa e simpel motibu ku e no ta trese un alternativa. Ta mas bien un guera kontra Hulanda di rabia i odio kontra makamba.Ta fásil pa bisa bo no ta kontra Hulanda i makamba, pero no ke traha i koperá ku Hulanda pero ta trese dilanti ku ta obligashon di Hulanda pa yuda finasieramente i ta bini, pa hasi impreshon, ku falsifikashon di historia.

Dikon falsifikashon, pa motibu ku no ta mustra riba e proseso ku a tuma lugá i bou di sirkunstanshanan di. 1948, 1951, 1954 1969, 1983,1986, 2000 i 2004 pa yega na 2010. Ta eksigí un grado di nivel pa por analisá i tuma akshon ku un meta bon deliñá ku ta na bienestar di habitantenan di Boneiru. Mi konklushon ta ku na e momentunan akí e struktura ta bon. Tin na Boneiru partidonan polítiko ku sí ke traha ku Hulanda i ta mira posibilidat den e programa di gobernashon di gabinete Rutte 3 ku ta duna espasio pa dialogo. Bunita di e partidonan akí ta ku nan ta desaroyando modelonan basá riba nesesidat di e pueblo. Ta partidonan di: Bijkerk, Richards, Clark di Demokrat nobo i Elvis ku e grupo di hóbennan studiá i talentoso. PHU den gobernashon Rood Wit Blou a purba pero no a logra pa motibu di diferensianan interno. Partido di Richards no a haña e oportunidat pa drenta Konseho Insular, pero tin ingredientenan, basá realmente riba un filosofia kristian ku ta duna speransa. MPB den koalishon i oposishon ta sigui un liña ku ta totalmente otro di e partidonan tradishonal. MPB a presentá un moshon, ku koalishon a rechasá. Mirando ku e moshon ta basá riba artíkulo 172 insiso 2 di WolBES i no pensamentunan sin un base lógiko, gezahèber a duna di konosé ku e ta bai traha netamente riba e artíkulo ei pa motibu ku e ta kai bou di su outoridat.

Sra. Emerencia tabatin komo meta ekselensia, pero UPB/Santana a disidí otro.Demokrat di konsehal Beukenboom a protestá fuerte kontra e koalishon UPB/Santana den e kaso aki, pero awor ta laga e oprotunidat pasa. Diputado Edsel Cicilia mester por kòrda e kaso den kua su kolega Kroon tabata enbolbí. Ta yega e momentu ku James Kroon tin ku hasi un limpiesa den UPB i yama danki na su konseheronan di UPB i traha sinseramente ku konsehal Maritsa Silberie.

Dikon no por traha estrechamente ku: Glenn Thodé, Jaime Saleh, Frits Goedgedrag, Anthony Nicolaas, Richard Hart, George Soliano, Jopi Abraham, Eveline Bethancourt- Anthony, Nina den Heyer i Ramiro Richards. Wak nan ekspertisio. Nan no ta personanan di guera pero di dialogo i lo bo saka benefisionan grandi pa Boneiru no pa nan komo persona. Sindikato i e mundu empresarial mester haña un aserkamentu mas profeshonal basá riba reglanan di dialogo. Partimentu di puesto manera: konsehero general, direktor di BHM i BIA pa lidernan ku nan tempu a pasa ta kontra reglanan di bon gobernashon. Boneiru ta den un posishon sumamente bon kaminda porta ta habrí pa kambionan kaminda ta bai duna ayudo susptansial pa ataká problemanan di pobresa, kas pa pueblo i e situashon sosial. Kua direkson ta bai: Guera, simpatia, odio, vengansa òf dialogo.”