Arthur Sealy: “Diputado Martis no ta duna un punto di bista polítiko riba e situashon di finansas di Boneiru”

Arthur Sealy copyArthur Sealy den su komunikado semanal ta trese dilanti ku diputado Martis a trese un punto di bista dilanti ku ta enserá ku  den e parti di negosashon ku Hulanda Boneiru a entregá muchu lihé gran parti di entradanan na Hulanda. Na final diputado Martis ta anunsiá ku dentro di poko Dudley Wederfoort lo bira diputado di finansas. Mester bini un diskushon popular ku ta kuminsá den Konseho Insular pa aklará kon e negosashonnan a bai ku Hulanda i ta dikon a entregá muchu lihé.  Ken tabata den  e grupo di negosashon pa e parti di finansas. Ta parse ku e personanan, apuntá komo eksperto no a hasi nan trabou bon, segun Sealy.

“Kon a organisá henter e asunto di negosashon e tempu ei. E gruponan tabata reuní na diferente isla i na Hulanda. Tin dokumento ku nos tur por tira bista aden i kuminsá diskutí, pero nos no gusta historia i pa tal motibu e ekspreshon di diputado Martis ta keda kologá den laira i e dede ta mustra riba miembronan di e grupo ku a negoshá  malu. E preguna ta, kon ta bai drecha e situashon aki.

Lamentablemente diputado Martis no ta mustra i no ta duna un punto di bista polítiko. Ku otro palabra no tin un plan riba e tereno di finansas i ta parse ku no ta bini un plan. Ku kambio di diputado lo bai pèrdè tempu balioso, pa motibu ku e diputado tin ku bai siña e weganan polítiko. E kolegio nobo no a hasi ningún intento te ainda pa bai papia ku Hulanda riba tereno di gobernashon ni no ta konosí ku a duna na e negoshadónan di D’66, CU, VVD i CDA di konosé ku den un gobièrnu nobo e punto di finasas di Boneiru òf BES mester ta akordá den un akuerdo di gobernashon.  

Den e akuerdo di simia tin den e promé punto ku ta bai sigui desaroyá i stabilisá e atministrashon di finansas i ta bai hiba un maneho i guia efektivo i drecha e situashon finansiero di Boneiru. Si t’asina, anto diputado Martis tin ku trese puntonan konkreto dilanti i laga pueblo mira sikiera e liñanan di un maneho efektivo. Esaki ta mi problema ku trahamentu di programa di gobernashon ku nòmber bunita. Ta bai pa e parti di kontenido. E plan no por kuminsá ku tiramentu di falta riba e grupo ku e tempu promé ku 10-10-10 a negoshá ku Hulanda. Henter e proseso di Laso Direkto ta di UPB, pues diputado Martis tambe a yega di forma parti di e deliberashonnan ei i si ta bon mester por haña den e dokumentonan punto di bista di diputado Martis.

Tabatin grupo di trabou pa e parti finansiero i a dediká tempu na e parti kon e situashon mester bira ora Boneiru tin Laso Direkto ku Hulanda. Ta un proseso ku a  kuminsá for di 2006 i kaba na 2010. Si Boneiru a entregá muchu lihé mester por mustra na kua momento kos a bai robes i kiko Konseho Insular a hasi. Awor ku nos ta 11 aña despues i ta tende remarke di diputado e pregunta ta kiko Konseho Insular ta bai hasi. Na 2006 e sistema tabata monismo  i awor ku tin dualismo ta bai kuestioná e diputado òf ta laga e deklarashon bai ku airu.

A yega e momento pa hiba diskushonnan ku kontenido den Konseho Insular. Ken ta e ekspertonan riba tereno di finansas.” Asina Arthur Sealy a asentuá.