Aquaspeed ku un tremendo End of the Year Race 2017

unnamedStichting Aquaspeed Bonaire Windsurfers ta organisá un biaha mas, un aktividat pa sera aña huntu ku e partisipante i boluntarionan. End of the Year Race 2017 ta tuma luga djadumingu awor dia 10 di desèmber dilanti Kas di Regatta riba Malecon, manera ya ta un tradishon i kustumber tur fin di aña. 

Registrashon ta kuminsa 9’or di mainta pa tur partisipante di Windsurfing, Optimist i Sunfish. 

Siguí pa mitar di 10 di mainta, Captains Meeting ku e partisipante nan di Optimist kategoria ABC i Sunfish kategoria ABC. E prome posibel kareda pa 10’or di mainta. Nos gran amigu Artie ta asistí nos den e parti di kordinashon pa e kareda nan di Optimist i Sunfish. 

Den e deporte di Windsurfing, Slalom ta bai tin 3 kategoria Superkids 11-13 aña, Big Kids 14-17 aña i adulto 18+. Skippers meeting ta pa 10’or di mainta, ku e prome posibel kareda pa 11’or di mainta. Pa e karedanan di windsurf, Bjorn Saragoza ta e Race Director. 

E dia aki ta bai ta un dia hopi plasentero den un esfera amistoso i festivo. Nos ta gradisi tur nos spònser nan ku ta duna nan kontribushon pa e aktividat aki bira realidat: Krioyo Paint, Budget Car Rental, TELBO/Kla Mobile, Prikichi Residence, Subway, Bonaire Gift Shop i WEB Bonaire NV.  

Nos ta tuma e oportunidat aki pa yama danki na tur nos spònser, kolaborador i boluntarionan ku ta demostrá nan konfiansa i sosten durante henter aña. Alabes nos ta desea nan huntu ku e deportistanan i prensa; Un bon Pasku i un felis aña nobo 2018.