Aktividat di kontamentu di para di awa ku STINAPA (Caribbean Waterbird Census)

black necked stiltsDjasabra 21 di yanuari STINAPA tin un aktividat di  kontamentu di para di awa pa asina kompilá informashon balioso tokante di para di awa na Boneiru di 4.30pm pa  6pm.

Boneiru ta un sitio di sosiego hopi importante pa paranan migratorio. Boneiru ta tuma konservashon di para hopi na serio i tin 5 sitio di RAMSAR i tambe 5 sitio hopi importante pa para. Den un esfuerso pa siña mas tokante di para, e organisashon Birds Caribbean i STINAPA ta hasi un súplika na gustadónan di para pa konta para di awa for di 14 di yanuari te ku 3 di februari 2017.

Si abo tambe ke partisipá i kontribuí na e konteo bo por djòin STINAPA dia 21 di yanuari di 4.30pm pa 6pm na LVV òf na e waf di piskadó na Sorobon. STINAPA su guianan lo topa ku bo na un di e dos sitionan menshoná ku papel pa registra dato, vèrekèiker si bo tin mester i tambe karchi pa identifikashon di para pa yuda ku e kompilashon di dato.

Kantidat di persona ta hopi limitá. Pa e motibu ei ta suplika interesadonan pa yama STINAPA na 717-8444 pa reservashon i bo sitio preferá, sea LVV òf Sorobon/

Si bo no por partisipá dia 21 yanuari pero lo ke yuda ku e kontamentu di para bo por bishita e wèpsait di Birds Caribbean www.birdscaribbean.org  pa mas informashon.