A para suspenshon di aresto di Guerlian G.

sala di hustisia copyDurante tratamentu di kaso penal djarason mainta, na dado momentu a yama pa trata e kaso kontra e homber Guerlian G. Ku no tabata presente den sala. Su abogado, mr. Winkel si tabata presente i a bisa di no sa si su kliente ta na Boneiru, ya ku e no por a lokalis’é riba telefon i ta atraves di Facebook el a bin tuma kontakto kune i a komprondé ku e ta na Miami i lo pasa un siman na Korsou. E abogado a bisa tamber ku su kliente no a risibi ningun invitashon (dagvaarding) pa ta den korte, pero ta dor di su kontakto a inform’é di esaki.

Fiskal di Ministerio Publiko mr. Hambeuker a pidi korte, ya komo ku e akusado ta riba suspenshon di su aresto pa termina esaki. Motibu ku el a duna ta, ku e akusado no a presenta den korte i ku e no ta atene su mes na sitanan ku Reclassering. Mesora a pidi Hues pa trata e kaso aki dia 7 di desember proksimo. Asina ku hues a brinda e fiskal esaki, mesora a pidi outoridatnan polisial pa buska i detene e akusado i hib’é paden.

Awe durante tratamentu di e kasonan penal, a presenta e akusado dilanti korte. Hues a mustra ku debí ku riba petishon di Ministerio Publiko a para e suspenshon, lei ta preskribi ku mas pronto posibel mester presenta e akusado pa inform’é ofisial di e motibunan i alaves skuch’é mas pronto posibel. E hues a bisa e akusado ku fisjkal a pidi pa termina e suspenshon di su detenshon, ya ku ta preskribí ku e mester ta keda disponibel pa outoridatnan hudisial tur momentu i el a bandona e isla sin aviso i no a presenta ni den korte, ni ta tene su mes na sitanan ku Reclassering.

Abogado mr. Winkel a mustra ku primeramente e ta keda straño ku no por a lokalisá su kliente pa por a dagvaard e pa e kaso di kual e no a haña un dagvaarding pé i rapidamente ayera por a logra detene su kliente. El a mustra tambe ku e number di telefon ku tantu outoridat i e tambe tin di su kliente, esaki no ta disponibel mas serka dje. Su relashjon ku Reclassering ta ku si akaso a surgi algu iregular, e mester informá Reclassering, pero no ku e tabatin ningun sita ku Reclassering i no a kumpli ku esaki. Ademas e no a presenta den korte, pasobra e no tabata na altura ku e mester a presentá, sino te ora ku su abogado a inform’é, pero nan a konkluí tambe ku esaki lo keda posponé. P’esei e no a presenta.

Mas aleu e abogado defensor a mustra ku nunka e no a mira un raport ku Reclassering a reporta su kliente di no a atendé ku sita, etc. Esaki a hasi ku e hues a mustra fiskal mr. Starrenburg ku e tampoko no tin un raport di Reclassering i gustosamente ke sa ku tin algu asina, pa inform’é di dje. Loke e fiskal a bai pa purba prueba i lo informá e hues di dje pa e por tuma e desishon di kontinua ku e akusado detene of pone bek den libertat.