50 aniversario di industria krusero

TCBE luna di novèmber TCB i stakeholders a selebrá luna krusero. E luna krusero tabata pa konsientisá i informá e komunidat lokal di e ‘ins and outs’ di e industria krusero di Boneiru. Durante e luna krusero tabatin un programa ‘information officer training’, kaminda studiantenan di MBO leisure & hospitality a haña training di kon pa bira ‘information officers’ pa ofisina di turismo. Tambe TCB tabatin e programa na radio Krusero50, ku tabatin komo invitado Hugo Gerharts un pionero den e industria, Maurice Adriaens direktor di turismo, Helen Thode i Joanny Trinidad parti di e tim di TCB i Clay Davelaar un operador di tour lokal. Tabatin un seshon di negoshi den kooperashon ku Kamer van Koophandel, kaminda operadornan di tour lokal a risibi mas informashon di e konsultant Evert Blijenberg di kon pa hiba nan negoshi na e siguiente nivel. 

E kulminashon di e luna krusero a tuma luga 24 di novèmber. Esaki ta e dia ku 50 aña pasa e prome barku krusero a bishitá Boneiru. TCB i tur e stakeholders di turismo a selebrá riba e ‘midden pier’ den un ambiente agradabel pa e ‘mile stone’ aki den e industria. Durante e anochi aki, e pioneronan den e industria ku tabata instrumental den kuminsando e industria krusero manera sr. Hugo Gerharts, sr. Toon Abraham i sr. Raymundo Saleh a wordu honrá i tambe sr. Gabriele Tixi kende tabata instrumental den aumenta e industria krusero den e lastu 5 añanan.

TCB tabatin un rekonosementu spesial pa haven kantoor i Don Andres NV pa nan suporte kontinuo i nan kooperashon den e industria krusero.

TCB ke yama un danki na tur e partidonan envolvi den e industria krusero pa hopi aña, e agentenan di haven kende pa hopi aña ta promové Boneiru i ku tur dia ta hasi nan bèst pa akomodá e liña kruseronan na nos isla. E operadornan di  tour ku ta traha duru pa ofrese e miho eksperensia na nos bishitantenan. E taksistanan ku ta asegurá pa e bishitantenan yega nan destinashon.

E bendedonan den e merkado krusero ku ta ofrese e miho di nos isla. Tur pakus, restorant, hotel, bar i aktividatnan ku tur ta añadi na e eksperensia pa e turista. OLB ku kontinuamente ta inverti den turismo di nos isla. E tim di TCB ku ta traha duru pa asegura ku Boneiru ta riba mapa i ku ta laga kada bishitante sinti mane nan ta di berdat amigu di nos.

Henter komunidat ku pa hopi aña ta mustra nos bishitantenan ku nan ta bon bini akinan i ku Boneiru di berdat ta un isla amable.

Un danki grandi na tur hende i awor laga nos sigui traha pa un mas 50 aña den industria krusero!